மட்டக்களப்பு பேத்தாழையில் அமைந்துள்ள அருள்மிகு ஸ்ரீ பாலாம்பிகாசமேத பாலீஸ்வரர் ஆலயத்தின் ஏற்பாட்டில், பேத்தாழை பாரதியார் முன்பள்ளி மாணவர்களுக்கு புத்தகப்பைகள் வழங்கும் நிகழ்வு இன்று நடைபெற்றது.
பாரதியார் முன்பள்ளி ஆசிரியர்களின் வேண்டுகோளுக்கு இணங்க, முன்பள்ளியின் 44ஆவது கலை விழாவைச் சிறப்பிக்கும் வகையில் இந்த உதவித்திட்டம் முன்னெடுக்கப்பட்டது.
ஆலயத் தலைவர் திரு. கி. கெங்கேஸ்வரன் அவர்களின் ஏற்பாட்டில், ஆலய வளாகத்தில் நடைபெற்ற நிகழ்வில், ஆலய பிரதம குருக்கள், கணக்காய்வாளர் மற்றும் நிர்வாக சபை உறுப்பினர்கள் இணைந்து சிறார்களுக்கான புத்தகப்பைகளை வழங்கி வைத்தனர்.
மாணவர்களின் கல்வி வளர்ச்சிக்கு ஊக்கமளிக்கும் நோக்கில் முன்னெடுக்கப்பட்ட இச்செயற்பாடு, பெற்றோர்கள் மற்றும் ஆசிரியர்கள் மத்தியில் வரவேற்பைப் பெற்றுள்ளது.
மேலும், மாணவர்களின் கல்வி முன்னேற்றத்திற்குத் தொடர்ந்து ஆதரவளித்து, சமூக நலப் பணிகளில் தமது பங்களிப்பை வழங்குவதற்கு ஆலயம் உறுதிபூண்டுள்ளதாகவும் இதன்போது தெரிவிக்கப்பட்டது.












