இலஞ்சம் கோரிய குற்றச்சாட்டில் குற்றவாளியாகக் காணப்பட்ட நாரஹேன்பிட்டி மதுவரித் திணைக்களத்தின் முன்னாள் அதிகாரி ஒருவருக்கு ஆறு குற்றச்சாட்டுகளின் கீழ் மொத்தம் 30 ஆண்டுகள் கடூழியச் சிறைத்தண்டனை விதிக்கப்பட்டுள்ளது.
இலஞ்சம் அல்லது ஊழல் குற்றச்சாட்டுகளை விசாரணை செய்யும் ஆணைக்குழு (CIABOC) இந்தத் தகவலை வெளியிட்டுள்ளது.
போகஹகே சுசந்த பிரியதர்ஷன (Bogahage Susantha Priyadarshana) என்பவருக்கே கொழும்பு மேல் நீதிமன்றத்தினால் இந்தத் தண்டனை விதிக்கப்பட்டுள்ளது.
இலஞ்சச் சட்டத்தின் கீழ் சுமத்தப்பட்ட ஆறு குற்றச்சாட்டுகளிலும் அவர் குற்றவாளியாகக் காணப்பட்டதைத் தொடர்ந்து, கடந்த ஒக்டோபர் 28ஆம் திகதி மேல் நீதிமன்ற நீதிபதி மொஹமட் மிஹால் இந்தத் தீர்ப்பை வழங்கியுள்ளார்.
இதன்படி, ஒவ்வொரு குற்றச்சாட்டுக்கும் தலா ஐந்து ஆண்டுகள் வீதம் மொத்தமாக 30 ஆண்டுகள் கடூழியச் சிறைத்தண்டனை விதிக்கப்பட்டுள்ளது.
சட்டவிரோத போதை மாத்திரைகள் தொடர்பான குற்றச்சாட்டில் பெண்ணொருவரின் கணவர் கைது செய்யப்பட்ட சம்பவத்துடன் தொடர்புடையதாகவே இந்த இலஞ்சக் கோரிக்கை இடம்பெற்றுள்ளது.
குறித்த பெண்ணின் கணவருக்கு எதிராகக் குறைந்த தண்டனைக்குரிய குற்றச்சாட்டைப் பதிவு செய்வதாக உறுதியளித்து, அதிகாரி 60 இலட்சம் ரூபா இலஞ்சம் கோரியுள்ளார்.
இதில் ஏற்கனவே 29 இலட்சம் ரூபாவைப் பெற்றுக்கொண்ட அவர், பின்னர் மேலும் 10 இலட்சம் ரூபாவைக் கோரியுள்ளதாக விசாரணைகளில் தெரியவந்துள்ளது.
சிறைத்தண்டனைக்கு மேலதிகமாக, ஆறு குற்றச்சாட்டுகளுக்கும் சேர்த்து 30,000 ரூபா அபராதமும் நீதிமன்றத்தினால் விதிக்கப்பட்டுள்ளது.
மேலும், இலஞ்சமாகப் பெற்றுக்கொண்ட 29 இலட்சத்து 20 ஆயிரம் ரூபா மற்றும் 10 இலட்சம் ரூபா ஆகிய தொகைகளைச் செலுத்துமாறும் நீதிமன்றம் உத்தரவிட்டுள்ளது.
அத்துடன், வழக்கின் முதலாவது அரச தரப்பு சாட்சியாளருக்கு 29 இலட்சத்து 20 ஆயிரம் ரூபாவை இழப்பீடாக வழங்குமாறும் உத்தரவிடப்பட்டுள்ளது.
குறித்த அபராதங்கள் மற்றும் நிதித் தொகைகளைச் செலுத்தத் தவறும் பட்சத்தில் மேலதிக சிறைத்தண்டனையை அனுபவிக்க நேரிடும் எனவும் நீதிமன்றம் அறிவித்துள்ளது.
இதேவேளை, விதிக்கப்பட்ட 30 ஆண்டுகால சிறைத்தண்டனையை ஒரே நேரத்தில் அனுபவிக்க வேண்டுமா அல்லது ஒன்றன்பின் ஒன்றாக அனுபவிக்க வேண்டுமா என்பது தொடர்பில் வெளியிடப்பட்ட தகவல்களில் தெளிவுபடுத்தப்படவில்லை.







