அரசமைப்பின் 13ஆவது திருத்தச் சட்டத்தில் உள்ள பொலிஸ் அதிகாரத்தை நீக்குவதற்கு 22ஆவது திருத்தச் சட்டத்தை அடுத்த வாரம் பாராளுமன்றத்தில் தான் சமர்ப்பிக்கவுள்ளார் என்று உதய கம்மன்பில தெரிவித்துள்ளார். பிவித்துரு ஹெல உறுமய கட்சியின் தலைவரும் பாராளுமன்ற உறுப்பினருமான அவர் தனிநபர் பிரேர ணையாக இந்தத் திருத்தத்தை கொண்டு வரவுள்ளதாகத் தெரிவித்தார். அவரின் கட்சியின் தலைமை பணிமனையில் நேற்று நடத்திய செய்தியாளர் சந்திப்பிலேயே இதனைத் தெரிவித்தார்.
மேலும், “எதிர்வரும் ஜனாதிபதித் தேர்தலில் தமிழ் மக்களின் வாக்குகளைப் பெற்றுக்கொள்ள ஜனாதிபதி ரணில் விக்கிரமசிங்க தமிழ்த் தேசியக் கூட்டமைப்புடன் ஏற்படுத்திக் கொண்டுள்ள இணக்கப்பாட்டின் பிரகாரம் 13ஆவது திருத்தச்சட்டத்தை முழுமையாக நடைமுறைப்படுத்தும் உறுதிமொழியை வழங்கியுள்ளார்.
ஜனாதிபதியுடனான சந்திப்பில் பொலிஸ் அதிகாரத்தை பின்னரும் ஏனைய அதிகாரங்களை நடைமுறைப்
படுத்தவும் இணக்கப்பாடுகள் எட்டப்பட்டன என்று பாராளுமன்ற உறுப்பினர் எம். ஏ. சுமந்திரன் அறிவித்திருந்தார். இதற்காக சர்வகட்சி கூட்டம் ஒன்றுக்கு ஜனாதிபதி அழைப்பு விடுத்துள்ளார். ரணில் விக்கிரமசிங்கவுக்கு அதிகாரம் கிடைத்திருந்த அனைத்து சந்தர்ப்பங்களிலும் தேசியப் பாதுகாப்புக்கு அச்சுறுத்தல்கள் ஏற்பட்டுள்ளதுடன் அது இருள் சூழ்ந்த யுகத்துக்கே தள்ளப்பட்டிருந்தது – என்றும் கூறினார்.
