விகாரையொன்றின் காணியை துப்பரவு செய்யும் போது, கைக்குண்டு ஒன்று வெடித்து சிதறிய சம்பவம் பெரும் பரபரப்பை ஏற்படுத்தியுள்ளது.
குறித்த சம்பவம் நேற்றுமுன்தினம் (27) இடம்பெற்றுள்ளது.
இச் சம்பவம் தொடர்பில் மேலும் தெரியவருவதாவது,
பெலியஅத்த நிஹிலுவா பிரதேசத்தில் உள்ள விகாரையொன்றில் காணியை உழவு இயந்திரம் ஒன்று துப்பரவு செய்து கொண்டிருந்த போது, வெளிநாட்டில் தயாரிக்கப்பட்ட கைக்குண்டு வெடித்து சிதறியதாகவும், பின்னர் மேலும் இரண்டு கைக்குண்டுகள் கண்டுபிடிக்கப்பட்டதாகவும் தென் மாகாண சிரேஷ்ட பிரதிப் பொலிஸ் மா அதிபர் அலுவலகம் தெரிவித்துள்ளது.
குறித்த உழவு இயந்திரம் விகாரைக்குச் சொந்தமானது எனவும், உழவு இயந்திரத்தின் பின்புறம் புல் வெட்டும் இயந்திரத்தை பொருத்தி விகாரை மடாதிபதியின் உறவினர் ஒருவர் புல் வெட்டும் போது வெடிகுண்டு வெடித்துள்ளது.
குறித்த வெடிவிபத்தில் உழவு இயந்திரத்தின் ஓட்டுநருக்கு எவ்விதகாயங்களும் ஏற்படவில்லை என தெரிவிக்கப்படுகிறது.
அதனைத் தொடர்ந்து மேற்கொள்ளப்பட்ட தேடுதல் வேட்டையில், அருகில் மேலும் இரண்டு வெடிகுண்டுகள் கண்டெடுக்கப்பட்டன.
இதனையடுத்து, பெலியத்த பன்வெவ விசேட அதிரடிப்படையின் வெடிகுண்டு செயலிழப்பு பிரிவினர் குறித்த பகுதிக்கு சென்று வெடிகுண்டுகளை செயலிழக்கச் செய்வதற்கான நடவடிக்கைகளை மேற்கொண்டுள்ளதாகவும் தெரிவிக்கப்படுகிறது.
