நீர்கொழும்பு சிறைச்சாலையில் இடம்பெற்ற வன்முறைச் சம்பவத்தில் குறைந்தது 25 பேர் உயிரிழந்துள்ள நிலையில், அதற்கான முழுப் பொறுப்பையும் அரசாங்கம் ஏற்க வேண்டும் என எதிர்க்கட்சித் தலைவர் சஜித் பிரேமதாச வலியுறுத்தியுள்ளார்.
இன்று (06) வெளியிட்டுள்ள விசேட அறிக்கையில், சிறைச்சாலை நிர்வாகத்தின் செயலிழப்பும் அலட்சியமுமே இந்த உயிரிழப்புகள் மற்றும் காயங்களுக்கு காரணம் என அவர் குற்றஞ்சாட்டியுள்ளார்.
தற்போதைய ஜனாதிபதி எதிர்க்கட்சியில் இருந்தபோது, சிறைச்சாலைகளில் உயிரிழப்புகள் ஏற்பட்டால் அதற்கான பொறுப்பு அரசாங்கத்தையே சாரும் என தெரிவித்திருந்ததை நினைவுபடுத்திய சஜித் பிரேமதாச, அதே கொள்கை தற்போதைய அரசாங்கத்திற்கும் பொருந்த வேண்டும் என குறிப்பிட்டுள்ளார்.
அரசாங்கம் வாக்குறுதியளித்திருந்த System Change தோல்வியடைந்துள்ளதாகவும், நீர்கொழும்பு சிறைச்சாலை சம்பவம் ஆட்சி, சட்டம்-ஒழுங்கு மற்றும் சிறைச்சாலை நிர்வாகத்தில் காணப்படும் பாரிய குறைபாடுகளை அம்பலப்படுத்தியுள்ளதாகவும் அவர் தெரிவித்துள்ளார்.
மேலும், நாட்டில் சட்டம் மற்றும் ஒழுங்கை பேணுவதற்கும், மனிதாபிமான அடிப்படையிலான சிறைச்சாலை நிர்வாகத்தை உறுதிப்படுத்துவதற்கும் அரசாங்கத்துக்கு திறன் உள்ளதா என்ற கேள்வியையும் அவர் எழுப்பியுள்ளார்.
இந்தச் சம்பவம் தொடர்பாக அரசாங்கத்திற்கு ஆதரவான அறிக்கையை வழங்கக்கூடிய குழுவின் விசாரணைக்கு பதிலாக, சுயாதீனமான, பாரபட்சமற்ற மற்றும் வெளிப்படையான விசாரணை முன்னெடுக்கப்பட வேண்டும் எனவும் எதிர்க்கட்சித் தலைவர் வலியுறுத்தியுள்ளார்.
அத்துடன், தற்போதைய அரசாங்கம் தற்பெருமையை கைவிட்டு, தேசிய பாதுகாப்பு, சட்டம்-ஒழுங்கு மற்றும் சிறைச்சாலை நிர்வாகம் உள்ளிட்ட நாட்டின் அவசர பிரச்சினைகளுக்கு முன்னுரிமை வழங்கி உடனடி தீர்வுகளை மேற்கொள்ள வேண்டும் என்றும் சஜித் பிரேமதாச தனது அறிக்கையில் வலியுறுத்தியுள்ளார்.
