நிர்ணயிக்கப்பட்ட எடையை விட குறைவான எடையில் பாண் விற்பனை செய்தல் மற்றும் விலை, எடையை முறையாகக் காட்சிப்படுத்தாமை தொடர்பில் நாடு தழுவிய ரீதியில் நுகர்வோர் விவகார அதிகார சபை விசேட சோதனைகளை முன்னெடுத்துள்ளது.
செப்டம்பர் 29ஆம் திகதி இடம்பெற்ற சோதனைகளில் 107 கடைகள் மற்றும் பேக்கரிகள் பரிசோதிக்கப்பட்டதுடன், குறைந்த எடையிலான பாண் விற்பனை தொடர்பில் 35 சம்பவங்களும், எடையைக் காட்சிப்படுத்தாத 85 இடங்களும், விலையைக் காட்சிப்படுத்தாத 55 இடங்களும் அடையாளம் காணப்பட்டுள்ளன.
குறைந்த எடையிலான பாண் கண்டறியப்பட்டால், அதனை விற்பனை செய்த கடையுடன், பாணை உற்பத்தி செய்த பேக்கரியிலும் விசாரணைகள் முன்னெடுக்கப்படும் என அதிகார சபை தெரிவித்துள்ளது.
இதற்கு முன்னர் செப்டம்பர் 1 முதல் 3ஆம் திகதி வரை நடத்தப்பட்ட சோதனைகளில் 118 கடைகள் மற்றும் பேக்கரிகள் பரிசோதிக்கப்பட்டு, குறைந்த எடையிலான பாண் தொடர்பில் 54 சம்பவங்கள் கண்டறியப்பட்டிருந்தன.
இதன்படி, இரு கட்டங்களிலும் மொத்தம் 225 கடைகள் மற்றும் பேக்கரிகள் பரிசோதிக்கப்பட்டுள்ளதுடன், குறைந்த எடையிலான பாண் தொடர்பில் 89 சம்பவங்கள் பதிவாகியுள்ளன.
