தமிழரசுக் கட்சி உள்ளிட்ட ஆறு கட்சிகள் இணைந்து அமைத்துள்ள கூட்டணி தொடர்பில் பல்வேறு விமர்சனங்களை முன்வைத்து, ஈழத் தமிழர் முன்னணி கட்சியின் தலைவர் ஜெயா சரவணன் அறிக்கை ஒன்றை வெளியிட்டுள்ளார்.
இன்று (16) வெளியிடப்பட்ட அந்த அறிக்கையில், தமிழரசுக் கட்சியின் கொள்கைகள் மற்றும் அதன் யாப்பு தொடர்பாக தனது விமர்சனங்களை முன்வைத்துள்ள அவர், அம்பாறை மாவட்டம் உள்ளிட்ட கிழக்கு மாகாணத்தில் தமிழ் மக்களின் அரசியல் உரிமைகள் பாதுகாக்கப்பட வேண்டும் என வலியுறுத்தியுள்ளார்.
மேலும், முஸ்லிம்களுக்கு சுயாட்சி வழங்குவது தொடர்பாக தமிழரசுக் கட்சி நீண்டகாலமாக நிலைப்பாடு கொண்டுள்ளதாகக் குற்றஞ்சாட்டிய அவர், அதனை கடுமையாக விமர்சித்துள்ளார்.
அத்துடன், முன்னாள் தமிழ்த் தேசிய அரசியல் தலைவர்கள் மற்றும் விடுதலைப் போராட்டத்தின் அரசியல் பின்னணி தொடர்பாகவும் பல்வேறு கேள்விகளை அவர் தனது அறிக்கையில் எழுப்பியுள்ளார்.
கிழக்கு மாகாணத்தில் தமிழ் மக்களின் காணி, குடியேற்றம் மற்றும் மேய்ச்சல் நிலப் பிரச்சினைகள் உள்ளிட்ட விடயங்களில் தமிழரசுக் கட்சி போதுமான நடவடிக்கைகளை முன்னெடுக்கவில்லை என்றும் ஜெயா சரவணன் குற்றம்சாட்டியுள்ளார்.
மேலும், அண்மையில் உருவாக்கப்பட்டுள்ள ஆறு கட்சிகளின் கூட்டணி தமிழ் மக்களின் அரசியல் எதிர்பார்ப்புகளை நிறைவேற்றாது என தெரிவித்துள்ள அவர், அதற்கு எதிராக கிழக்கு மாகாணத்தில் அரசியல் ரீதியான போராட்டங்களை முன்னெடுக்கத் தயாராக இருப்பதாகவும் கூறியுள்ளார்.
இந்தக் கருத்துகள் ஈழத் தமிழர் முன்னணி கட்சியின் தலைவர் ஜெயா சரவணனால் வெளியிடப்பட்ட அறிக்கையில் இடம்பெற்றுள்ளன. மேற்கண்ட குற்றச்சாட்டுகள் தொடர்பாக தமிழரசுக் கட்சி அல்லது சம்பந்தப்பட்ட தரப்பினரின் பதில் இதுவரை வெளியாகவில்லை.
