கொழும்பு கொம்பனித்தெரு பகுதியில் சிற்றுண்டிக் கடை ஒன்றின் பின்னால் இரகசியமாக இயங்கி வந்ததாகக் கூறப்படும் நிலத்தடி இரவு விடுதி ஒன்றை கலால் திணைக்கள அதிகாரிகள் முற்றுகையிட்டுள்ளனர்.
கடந்த 21ஆம் திகதி முன்னெடுக்கப்பட்ட இந்தச் சோதனை நடவடிக்கையின்போது, சட்டவிரோதமாக விற்பனைக்காக வைத்திருந்ததாகக் கூறப்படும் வெளிநாட்டு மதுபானப் போத்தல்கள் உள்ளிட்ட பொருட்கள் கைப்பற்றப்பட்டதாக அதிகாரிகள் தெரிவித்துள்ளனர்.
வெளிப்புறத்தில் குறித்த இடம் முறுக்கு மற்றும் பல்வேறு சிற்றுண்டிகள், குளிர்பானங்கள் விற்பனை செய்யும் சாதாரண கடையாகவே காணப்பட்டதாக தெரிவிக்கப்பட்டுள்ளது.
அதிகாரிகள் மேற்கொண்ட விசாரணையின்போது, சிற்றுண்டிப் பொதிகள் வைக்கப்பட்டிருந்த அலமாரி அகற்றப்பட்டதைத் தொடர்ந்து, நிலத்தடி பகுதிக்குச் செல்லும் இரகசிய நுழைவாயில் ஒன்று கண்டுபிடிக்கப்பட்டதாக தெரிவிக்கப்பட்டுள்ளது.
இந்தச் சம்பவம் தொடர்பில் மேலதிக விசாரணைகள் முன்னெடுக்கப்பட்டு வருவதாகவும் கலால் திணைக்கள அதிகாரிகள் தெரிவித்துள்ளனர்.
