எல்ல நீர்வீழ்ச்சியை பார்வையிடச் சென்ற 26 வயதுடைய நெதர்லாந்து நாட்டுப் பெண்ணொருவர் தவறி விழுந்து உயிரிழந்துள்ளார்.
இந்தச் சம்பவம் நேற்று (24) மதிய வேளையில் இடம்பெற்றதாக எல்ல சுற்றுலா பொலிஸார் தெரிவித்துள்ளனர்.
இரு வெளிநாட்டு யுவதிகள் எல்ல நீர்வீழ்ச்சியை பார்வையிடச் சென்றிருந்த நிலையில், அவர்களில் ஒருவர் தவறி நீர்வீழ்ச்சிப் பகுதியில் கீழே விழுந்து சம்பவ இடத்திலேயே உயிரிழந்துள்ளதாக தெரிவிக்கப்படுகிறது.
கடும் சிரமங்களுக்கு மத்தியில் பிரதேச மக்களின் உதவியுடன் உயிரிழந்தவரின் சடலம் மீட்கப்பட்டதுடன், பின்னர் 1990 அவசர அம்பியூலன்ஸ் சேவை மூலம் பதுளை மாவட்ட பொது வைத்தியசாலைக்கு பிரேத பரிசோதனைக்காக எடுத்துச் செல்லப்பட்டது.
அப்பகுதியில் நிலவும் சீரற்ற வானிலை மற்றும் ஆபத்தான நிலைமைகளை கருத்திற்கொண்டு, நீர்வீழ்ச்சிகள் உள்ளிட்ட ஆபத்தான பகுதிகளுக்குச் செல்லும் உள்நாட்டு மற்றும் வெளிநாட்டு சுற்றுலாப் பயணிகள் அவதானத்துடன் செயற்படுமாறு அதிகாரிகள் அறிவுறுத்தியுள்ளனர்.
சம்பவம் தொடர்பான மேலதிக விசாரணைகளை எல்ல பொலிஸார் முன்னெடுத்து வருகின்றனர்.
