பௌத்த மதத்திற்கும் அதன் பாரம்பரியங்களுக்கும் எதிராக எழுவதாகக் கூறப்படும் அச்சுறுத்தல்களைக் கண்டித்து, எதிர்வரும் 11ஆம் திகதி மிஹிந்தலை கட்டுசாவிற்கு அருகில் மாபெரும் சத்தியாக்கிரகப் போராட்டம் மற்றும் அதிஷ்டான பூஜை நடத்த ஏற்பாடுகள் செய்யப்பட்டுள்ளன.
கொழும்பில் நடைபெற்ற விசேட செய்தியாளர் சந்திப்பில் கலந்துகொண்டு கருத்துத் தெரிவித்த பூஜ்ய உலபனை சுமங்கல தேரர், சமஸ்த லங்கா பௌத்த மகா சம்மேளனத்தின் ஏற்பாட்டில் இந்த நிகழ்வு முன்னெடுக்கப்படவுள்ளதாகத் தெரிவித்தார்.
தற்போதைய அரசாங்கம் பௌத்த மதத்திற்கு எதிரான நிலைப்பாட்டில் செயற்படுவதாகக் குற்றஞ்சாட்டிய அவர், பௌத்த பிக்குகளுக்கு எதிரான வன்முறைகளைக் கண்டிப்பதுடன், சிறைச்சாலையில் தடுத்து வைக்கப்பட்டுள்ள கலகொடஅத்தே ஞானசார தேரரை உடனடியாக விடுதலை செய்யுமாறு வலியுறுத்தியும் இந்தப் போராட்டம் நடத்தப்படுவதாகக் குறிப்பிட்டார்.
இதேவேளை, செய்தியாளர் சந்திப்பில் கலந்துகொண்ட சமஸ்த லங்கா பௌத்த மகா சம்மேளனத்தின் தலைவர் சந்திரா நிமல் வாக்கிஷ்ட மற்றும் ‘மகாஜன கேந்திரய’ அமைப்பின் நிறைவேற்றுப் பணிப்பாளர் கேலும் ஜெயசுமன ஆகியோரும், இந்த நிகழ்வுக்கு எந்தவித அரசியல் நோக்கமும் இல்லை எனத் தெரிவித்துள்ளனர்.
