சிறைத்தண்டனை அனுபவித்து வரும் பொதுபல சேனா அமைப்பின் பொதுச்செயலாளர் கலகொடஅத்தே ஞானசார தேரரின் துறவற ஆடையை (காவி ஆடை) அகற்ற வேண்டாம் என கோட்டை ஸ்ரீ கல்யாணி சாமக்ரீ தர்ம மகா சங்க சபை சிறைச்சாலைகள் ஆணையாளர் நாயகத்திடம் எழுத்துப்பூர்வமாகக் கோரிக்கை விடுத்துள்ளது.
ஞானசார தேரர் துறவற ஆடைகளுடனேயே நீதிமன்றத்திலும் சிறைச்சாலையிலும் தொடர்ந்தும் முன்னிலையாக அனுமதிக்கப்பட வேண்டும் என கோட்டை ஸ்ரீ கல்யாணி சாமக்ரீ தர்ம மகா சங்க சபையின் அனுநாயக்கரும் மூத்த பேராசிரியருமான கொட்டபிட்டியே ராகுல அனுநாயக்க தேரர் இக்கடிதத்தை அனுப்பி வைத்துள்ளார்.
ஞானசார தேரர் பௌத்த வினய விதிகளின்படி துறவறத்தை இழக்கச் செய்யும் வகையிலான பெருங்குற்றம் (பாராஜிகா) எதையும் புரிந்ததாகத் தமது சங்க சபைக்கு எந்தவொரு அறிக்கையும் கிடைக்கவில்லை என அக்கடிதத்தில் சுட்டிக்காட்டப்பட்டுள்ளது. மேலும், பிக்கு ஒருவரின் துறவற ஆடையை அகற்றும் அதிகாரம் சம்பந்தப்பட்ட பிக்குவுக்கும் அவர் சார்ந்துள்ள மகா சங்க சபைக்கும் மட்டுமே உரித்தானது என்றும், சிறைச்சாலை அதிகாரிகளுக்கு அதற்கு அதிகாரமில்லை என்றும் அதில் காரசாரமாகச் சுட்டிக்காட்டப்பட்டுள்ளது.
