யாழ்ப்பாணம், சண்டிலிப்பாய் பகுதியில் ஐஸ் போதைப்பொருள் மற்றும் போதை மாத்திரைகளுடன் 24 வயதுடைய இளைஞர் ஒருவர் நேற்று (08) கைது செய்யப்பட்டுள்ளார்.
யாழ்ப்பாணம் விசேட குற்றப் புலனாய்வுப் பிரிவினருக்குக் கிடைத்த இரகசியத் தகவலின் அடிப்படையில், சந்தேகநபரின் வீட்டில் மேற்கொள்ளப்பட்ட சோதனை நடவடிக்கையின்போது 680 மில்லிகிராம் ஐஸ் போதைப்பொருளும் 300 போதை மாத்திரைகளும் கைப்பற்றப்பட்டதாகப் பொலிஸார் தெரிவித்துள்ளனர்.
கைது செய்யப்பட்ட சந்தேகநபர் மானிப்பாய் பொலிஸாரிடம் ஒப்படைக்கப்பட்டுள்ளதுடன், அவரை மேலதிக சட்ட நடவடிக்கைகளுக்காக மல்லாகம் நீதிமன்றில் முன்னிலைப்படுத்த நடவடிக்கை எடுக்கப்பட்டுள்ளது.
மேலும், சந்தேகநபருக்கு எதிராக ஏற்கனவே பல வழக்குகள் உள்ளதுடன், சில வழக்குகள் நிலுவையில் இருப்பதாகவும் ஆரம்பகட்ட விசாரணைகளில் தெரியவந்துள்ளதாகப் பொலிஸார் தெரிவித்துள்ளனர்.
சம்பவம் தொடர்பான மேலதிக விசாரணைகளைப் பொலிஸார் முன்னெடுத்து வருகின்றனர்.
