பிரான்ஸில் துப்பாக்கிச் சூடு; ஒருவர் பலி, ஐவர் காயம்; இனவாதத் தாக்குதல் என மக்ரோன் கண்டனம்!

பிரான்ஸில் முஸ்லிம்கள் மற்றும் வெளிநாட்டுப் பின்னணியைக் கொண்டவர்களைக் குறிவைத்து நடத்தப்பட்டதாகச் சந்தேகிக்கப்படும் துப்பாக்கிச் சூட்டுச் சம்பவத்தில் ஒருவர் உயிரிழந்துள்ளதுடன், ஐவர் காயமடைந்துள்ளனர். இந்தச் சம்பவத்துடன் தொடர்புடையவர் எனச் சந்தேகிக்கப்படும் 39 வயதுடைய நபர் கைது செய்யப்பட்டுள்ளார்.

பாரிஸுக்கு அருகிலுள்ள யுவெலின் (Yvelines) மாவட்டத்தின் திரப்பேஸ் (Trappes) மற்றும் லா வெரியர் (La Verrière) ஆகிய பகுதிகளில் நேற்று வெள்ளிக்கிழமை (23) இந்தத் துப்பாக்கிச் சூட்டுச் சம்பவம் இடம்பெற்றுள்ளது.

சந்தேகநபர் வாகனத்தில் பயணித்தபடி எரிபொருள் நிரப்பு நிலையம், மருத்துவ நிலையம் மற்றும் சிறுவர் விளையாட்டுப் பகுதி உள்ளிட்ட பல்வேறு இடங்களில் துப்பாக்கிச் சூடு நடத்தியதாகத் தெரிவிக்கப்படுகிறது. இந்தத் தாக்குதலில் 26 வயதுடைய ஒருவர் உயிரிழந்துள்ளதுடன், 12 வயதுச் சிறுமி உட்பட ஐவர் காயமடைந்துள்ளனர்.

காயமடைந்த சிறுமி பலத்த காயங்களுடன் மருத்துவமனையில் அனுமதிக்கப்பட்ட நிலையில், பின்னர் அவரது உடல்நிலை சீரடைந்து நிலைப்படுத்தப்பட்டுள்ளதாக உள்ளூர் மேயர் தெரிவித்ததாக ஊடகங்கள் செய்தி வெளியிட்டுள்ளன.

சம்பவத்துடன் தொடர்புடையவர் எனச் சந்தேகிக்கப்படும் கெவின் டி. (Kevin T.) என்ற 39 வயதுடைய நபர் பொலிஸாரால் கைது செய்யப்பட்டுள்ளார். சந்தேகநபரின் வாகனத்திலிருந்து தானியங்கித் துப்பாக்கி வகையைச் சேர்ந்த ஆயுதம் மற்றும் கண்ணீர்ப்புகைக் குண்டுகள் கைப்பற்றப்பட்டதாகப் பொலிஸ் வட்டாரங்களை மேற்கோள்காட்டி செய்திகள் வெளியாகியுள்ளன.

மேலும், சந்தேகநபரின் வீட்டில் மூன்று எரிவாயு உருளைகள் மற்றும் மின்சாரக் கம்பிகளைப் பயன்படுத்தி அமைக்கப்பட்டதாகக் கூறப்படும் பொறி சாதனமொன்றும் கண்டுபிடிக்கப்பட்டுள்ளதாகத் தெரிவிக்கப்படுகிறது.

தாக்குதலுக்கான பின்னணி குறித்து விசாரணைகள் தீவிரப்படுத்தப்பட்டுள்ள நிலையில், பாதிக்கப்பட்டவர்கள் அவர்களின் தோல் நிறம் அல்லது மதத்தின் அடிப்படையில் குறிவைக்கப்பட்டிருக்கலாம் என அதிகாரிகள் சந்தேகிக்கின்றனர். இதனையடுத்து, பிரான்ஸின் தேசிய பயங்கரவாத எதிர்ப்புப் பிரிவு விசாரணைகளைப் பொறுப்பேற்றுள்ளது.

இந்தச் சம்பவத்தைக் கண்டித்துள்ள பிரான்ஸ் ஜனாதிபதி இமானுவல் மக்ரோன், இதனை “இனவாதப் பயங்கரவாதத் தாக்குதல்” எனக் குறிப்பிட்டுள்ளார். தோல் நிறம் அல்லது மதத்தின் அடிப்படையில் மக்களைக் குறிவைத்துத் தாக்குவதை ஏற்றுக்கொள்ள முடியாது எனத் தெரிவித்த அவர், பாதிக்கப்பட்டவர்களுக்கும் அவர்களது குடும்பங்களுக்கும் ஆதரவு தெரிவித்துள்ளார்.

தாக்குதலின் நோக்கம் மற்றும் சந்தேகநபரின் பின்னணி தொடர்பான விசாரணைகள் தொடர்ந்து முன்னெடுக்கப்பட்டு வருகின்றன.