அர்னாப் சூறாவளியின் தாக்கத்தினால் மட்டக்களப்பு உள்ளிட்ட கிழக்கு மாகாணங்களுக்கு நேரடியான பாதிப்புகள் ஏற்பட வாய்ப்பில்லை எனத் தெரிவிக்கப்பட்டுள்ளது.
இந்நிலையில், உருவாகியுள்ள அர்னாப் சூறாவளியினால் இலங்கைக்கு நேரடியான பாதிப்புகள் எதுவும் இல்லை என ஏற்கனவே பல தடவைகள் தெளிவுபடுத்தப்பட்டுள்ளதாகவும், இலங்கை வளிமண்டலவியல் திணைக்களத்தின் வானிலை முன்னறிவிப்பிலும் இது தொடர்பான விளக்கங்கள் வழங்கப்பட்டுள்ளதாகவும் தெரிவிக்கப்பட்டுள்ளது.
எனவே, மட்டக்களப்பு மற்றும் அம்பாறை உள்ளிட்ட கிழக்கு மாகாண மக்கள் சூறாவளி தொடர்பில் தேவையற்ற அச்சமடைய வேண்டியதில்லை எனவும், இப்பகுதிகளில் சூறாவளியினால் பலத்த காற்றுத் தாக்கம் ஏற்படும் என எதிர்பார்க்கப்படவில்லை எனவும் குறிப்பிடப்பட்டுள்ளது.
இலங்கை வளிமண்டலவியல் திணைக்களத்தினால் 2026 ஒக்டோபர் 26ஆம் திகதி வெளியிடப்பட்ட வானிலை முன்னறிவிப்பின்படி, நாட்டின் தென்மேற்குப் பகுதிகளில் மழை அதிகரிக்கும் சாத்தியம் காணப்படுகின்றது.
இதற்கமைய, வடக்கு, மேல், சப்ரகமுவ, தென், வடமேல் மற்றும் மத்திய மாகாணங்களின் சில பகுதிகளிலும் திருகோணமலை மாவட்டத்தின் சில இடங்களிலும் அவ்வப்போது மழை அல்லது இடியுடன் கூடிய மழை பெய்யக்கூடும் என எதிர்வுகூறப்பட்டுள்ளது.
எனினும், மட்டக்களப்பு மற்றும் அம்பாறை மாவட்டங்களில் பாரிய மழைவீழ்ச்சி அல்லது சூறாவளித் தாக்கம் ஏற்படும் எனக் குறித்த முன்னறிவிப்பில் குறிப்பிடப்படவில்லை எனத் தெரிவிக்கப்பட்டுள்ளது.
பொதுமக்கள் உத்தியோகபூர்வ வானிலை அறிவிப்புகளைப் பின்பற்றி, உறுதிப்படுத்தப்படாத தகவல்களால் பீதியடையாமல் அவதானத்துடன் செயற்படுமாறு கேட்டுக்கொள்ளப்படுகின்றனர்.
