மாவீரர் மாதத்தின் முதல் நாளை முன்னிட்டு, மட்டக்களப்பு தரவை மாவீரர் துயிலும் இல்லத்தில் சிரமதானப் பணிகள் தமிழ் தேசிய மக்கள் முன்னணியினரால் நேற்று ஞாயிற்றுக்கிழமை (01) ஆரம்பித்து வைக்கப்பட்டன.
தமிழ் தேசிய மக்கள் முன்னணியின் செயலாளர் செல்வராசா கஜேந்திரன், தேசிய அமைப்பாளர் தர்மலிங்கம் சுரேஷ் ஆகியோரின் தலைமையில் கட்சியின் உறுப்பினர்கள் தரவை மாவீரர் துயிலும் இல்லத்திற்குச் சென்று இந்தச் சிரமதானப் பணிகளை முன்னெடுத்தனர்.
இதனைத் தொடர்ந்து, மாவீரர் மாதத்தின் ஆரம்பத்தை முன்னிட்டு துயிலும் இல்லத்தில் அமைந்துள்ள மாவீரர்களின் கல்லறைகளுக்கு மலர் தூவி அஞ்சலி செலுத்தினர்.
எதிர்வரும் நவம்பர் 27ஆம் திகதி மாவீரர் நினைவேந்தல் நிகழ்வுகள் அனுஷ்டிக்கப்படவுள்ள நிலையில், அதற்கான ஆரம்பகட்டப் பணிகளாக துயிலும் இல்லத்தைத் துப்புரவு செய்து தயார்படுத்தும் நடவடிக்கைகள் முன்னெடுக்கப்பட்டுள்ளன.
இதன்போது மாவீரர்களை நினைவுகூர்ந்து மலர் தூவி அஞ்சலி செலுத்தி மாவீரர் மாத நிகழ்வுகளையும் கட்சியினர் ஆரம்பித்து வைத்தனர்.
