மட்டக்களப்பு போதனா வைத்தியசாலையின் புதிய பணிப்பாளராக ( சிரேஷ்ட நிர்வாகப் பிரிவு-Senior Administration Grade) வைத்தியர் சுகுணன் குணசிங்கம் சுகாதார அமைச்சினால் உத்தியோகபூர்வமாக நியமிக்கப்பட்டுள்ளார். களுவாஞ்சிக்குடியைப் பூர்வீகமாகக் கொண்ட இவரது இந்த நியமனம் அப்பகுதி மக்களிடையேயும் மருத்துவ வட்டாரங்களிலும் பெரும் வரவேற்பைப் பெற்றுள்ளது.
அதேசமயம் காலியாக இருந்த இந்த மருத்துவமனைப் பணிப்பாளர் (End Post) பதவிக்காக யாழ்ப்பாணம், கொழும்பு மற்றும் மட்டக்களப்பைச் சேர்ந்த சிரேஷ்ட நிர்வாகப் பிரிவு அதிகாரிகள் நால்வர் விண்ணப்பித்திருந்தனர்.
இறுதிச்சுற்றுக்கு மட்டக்களப்பு பிராந்திய சுகாதார சேவைகள் பணிப்பாளர் டாக்டர் முரளீஸ்வரன் மற்றும் கல்முனை ஆதார வைத்தியசாலையின் பணிப்பாளர் டாக்டர் சுகுணன் ஆகியோர் தகுதிபெற்றனர்.
சுகாதார அமைச்சின் செயலாளர், பணிப்பாளர் ஜெனரல், பொதுச்சேவை ஆணைக்குழு மற்றும் பொது நிர்வாகத்துறை பிரதிநிதிகள் அடங்கிய ஐவர் கொண்ட குழுவினால் நடாத்தப்பட்ட நேர்முகப் பரீட்சையில், மிகச்சிறிய புள்ளி வித்தியாசத்தில் டாக்டர் சுகுணன் இந்தச் சாதனைப் பதவிக்குத் தெரிவு செய்யப்பட்டுள்ளார்.
இதேவேளை, லேடி ரிட்ஜ்வே வைத்தியசாலை (LRH), களுபோவில, ராகம, பேராதனை மற்றும் மட்டக்களப்பு உள்ளிட்ட நாட்டின் முன்னணி வைத்தியசாலைகளின் பணிப்பாளர் பதவிகளுக்காக, ‘Senior Administration Grade’ பிரிவைச் சேர்ந்த 21 சிரேஷ்ட வைத்தியர்கள் இந்த நேர்முகப் பரீட்சைக்குத் தோற்றியிருந்தது குறிப்பிடத்தக்கது.
