ஈரானுக்குச் சொந்தமான கெஷ்ம் (Qeshm) தீவை இலக்கு வைத்து அமெரிக்க இராணுவம் தொடர்ச்சியான வான்வழித் தாக்குதல்களை நடத்தியுள்ளதாக சர்வதேச ஊடகங்கள் செய்தி வெளியிட்டுள்ளன.
இது தொடர்பாக வெளிநாட்டு ஊடகங்களிடம் கருத்துத் தெரிவித்த மூன்று அமெரிக்க அதிகாரிகள், தாக்குதல்கள் இடம்பெற்றதை உறுதிப்படுத்தியுள்ளனர். அமெரிக்க இராணுவத் தளங்கள் மற்றும் பிராந்தியத்தில் உள்ள அதன் இராணுவ வளங்களைப் பாதுகாக்கும் தற்காப்பு நடவடிக்கையாகவே இத்தாக்குதல்கள் மேற்கொள்ளப்பட்டதாகவும் அவர்கள் தெரிவித்துள்ளனர்.
அமெரிக்க விமானம் ஒன்றின் மீது ஈரான் தாக்குதல் நடத்தியதைத் தொடர்ந்து பதிலடி நடவடிக்கையாக இந்தத் தாக்குதல் முன்னெடுக்கப்பட்டதாக அமெரிக்க அதிகாரி ஒருவர் குறிப்பிட்டுள்ளார்.
மேலும், ஈரானின் தரையிலிருந்து வானுக்கு ஏவப்படும் பாதுகாப்பு ஏவுகணைகள் அமெரிக்க இராணுவ வளங்களுக்கு அச்சுறுத்தலாக அமைந்ததால், அவற்றை எதிர்கொள்ளும் நோக்கில் இந்த நடவடிக்கை எடுக்கப்பட்டதாக மற்றொரு அதிகாரி தெரிவித்துள்ளார்.
எனினும், இந்தத் தாக்குதல் பாரிய அளவிலான போர் நடவடிக்கையாகக் கருதப்படக்கூடாது என்றும் அமெரிக்க தரப்பில் சுட்டிக்காட்டப்பட்டுள்ளது.
அமெரிக்க இடைக்காலத் தேர்தலுக்கு முந்தைய நாள் இந்தத் தாக்குதல் இடம்பெற்றுள்ளமை சர்வதேச அரசியல் வட்டாரங்களில் கவனத்தை ஈர்த்துள்ளது. இதன் மூலம் ஈரான் தொடர்பான பிராந்திய பதற்றம் இன்னும் முழுமையாகத் தணியவில்லை என்பது மீண்டும் வெளிப்பட்டுள்ளது.
இதற்கிடையில், ஈரானுடன் இணக்கப்பாட்டை எட்டுவதற்கான வாய்ப்புகள் இன்னும் இருப்பதாக அமெரிக்க ஜனாதிபதி டொனால்ட் டிரம்ப் சமூக ஊடகப் பதிவு ஒன்றின் மூலம் தெரிவித்திருந்தமை குறிப்பிடத்தக்கது.
