மூன்று ஆண்டுகளாகத் தொடரும் போராட்டம்; மேய்ச்சல் நிலமின்றித் தவிக்கும் மட்டக்களப்பு தமிழ் பால் பண்ணையாளர்கள்!

மட்டக்களப்பு மயிலத்தமடு – மாதவனை பகுதியில் மேய்ச்சல் நிலங்களை மீட்டுத் தருமாறு கோரி கடந்த மூன்று ஆண்டுகளாகப் போராடி வரும் தமிழ் பால் பண்ணையாளர்கள், அரசாங்கத்தின் தாமதமான நடவடிக்கைகளால் தொடர்ந்தும் பல்வேறு நெருக்கடிகளை எதிர்கொண்டு வருகின்றனர்.

மேய்ச்சல் நிலங்கள் இல்லாத காரணத்தினால் கால்நடைகளை முறையாகப் பராமரிக்க முடியாத நிலை ஏற்பட்டுள்ளதுடன், தமது மாடுகள் விவசாய நிலங்களுக்குள் புகுந்து பயிர்களைச் சேதப்படுத்தியதாகக் கூறி சிங்கள விவசாயிகள் முன்வைக்கும் முறைப்பாடுகளால் இழப்பீடு செலுத்த வேண்டிய நிலையும் ஏற்பட்டுள்ளதாகப் பால் பண்ணையாளர்கள் தெரிவிக்கின்றனர்.

மயிலத்தமடு – மாதவனை பால் பண்ணையாளர்களுக்காக 1,500 ஏக்கருக்கும் அதிகமான மேய்ச்சல் நிலங்களை விடுவிக்குமாறு ஜனாதிபதி அநுர குமார திஸாநாயக்க கடந்த மே மாதம் மகாவலி அபிவிருத்தி அதிகார சபைக்கு உத்தரவிட்டிருந்தார். எனினும், அந்த உத்தரவு இதுவரை நடைமுறைப்படுத்தப்படவில்லை எனக் கூறப்படுகிறது.

இதற்கிடையில், மேய்ச்சல் நிலங்களுக்கு அருகிலுள்ள வனப்பகுதிகளைத் தற்காலிகமாகப் பயன்படுத்தி கால்நடைகளை மேய்க்குமாறு கரடியனாறு பொலிஸாரும் மாவட்ட நிர்வாக அதிகாரிகளும் அறிவுறுத்தியுள்ளதாகப் பால் பண்ணையாளர்கள் தெரிவிக்கின்றனர்.

ஆனால், குறித்த வனப்பகுதிகளில் இராணுவத்தினர் பயிற்சிகளில் ஈடுபடுவதுடன், யானைகள் மற்றும் சிறுத்தைகள் போன்ற வனவிலங்குகளின் அச்சுறுத்தலும் காணப்படுவதால் அங்கு கால்நடைகளை மேய்ப்பது பாதுகாப்பானதல்ல என அவர்கள் சுட்டிக்காட்டுகின்றனர்.

மயிலத்தமடு – மாதவனை பால் பண்ணையாளர்கள் சங்கத்தின் தலைவர் சீனித்தம்பி நிமலன் தெரிவிக்கையில், வனப்பகுதிகளில் போதியளவு புற்கள் இல்லாததுடன், இராணுவத்தினரைக் காணும்போது கால்நடைகள் அச்சமடைந்து ஓடுவதாகவும் தெரிவித்துள்ளார்.

மேலும், வனவிலங்குகளால் கால்நடைகளின் உயிருக்கு ஆபத்து ஏற்படக்கூடிய சூழல் காணப்படுவதாகவும், சட்டரீதியாக மேய்ச்சல் நிலங்கள் ஒதுக்கப்படாத வரை தமது பிரச்சினைக்குத் தீர்வு கிடைக்கப்போவதில்லை எனவும் அவர் குறிப்பிட்டுள்ளார்.

இதேவேளை, விவசாய நிலங்களுக்குள் புகுந்து பயிர்களைச் சேதப்படுத்தியதாகக் கூறி தனது கால்நடைகளை விவசாயிகள் கட்டி வைத்ததுடன், பொலிஸாரிடம் முறைப்பாடு செய்ததாகப் பிரதேச பால் பண்ணையாளர் கந்தப்பு யோகலிங்கம் தெரிவித்துள்ளார்.

இது தொடர்பில் பொலிஸாரால் விசாரணைக்கு அழைக்கப்பட்டபோது, பயிர்ச் சேதத்திற்கான நட்டஈடாக 35,000 ரூபாய் செலுத்த வேண்டும் என அறிவிக்கப்பட்டதாகவும், தன்னிடம் போதிய பணம் இல்லாத காரணத்தினால் இறுதியில் 12,000 ரூபாய் செலுத்துவதற்கு இணக்கம் தெரிவித்ததாகவும் அவர் கூறியுள்ளார்.

மேலும், தனது 10 முதல் 15 வரையான கால்நடைகள் கட்டி வைக்கப்பட்டிருந்ததாகவும், அவற்றில் ஒரு பசுவும் கன்றுக்குட்டியும் இதுவரை திரும்பக் கிடைக்கவில்லை என்றும் அவர் கவலை வெளியிட்டுள்ளார்.

தமக்கு எதிராக மட்டுமே நடவடிக்கைகள் முன்னெடுக்கப்படுவதாகவும், கால்நடைகளை மேய்ப்பதற்கான உரிய நிலங்களைப் பெற்றுக்கொடுப்பதில் அதிகாரிகள் போதிய கவனம் செலுத்தவில்லை என்றும் அவர் குற்றஞ்சாட்டியுள்ளார்.

மேய்ச்சல் நிலப் பிரச்சினையின் பின்னணி:
மயிலத்தமடு – மாதவனை பகுதியைச் சேர்ந்த பாரம்பரிய பால் பண்ணையாளர்கள், தமது கால்நடைகளை மேய்ப்பதற்காக 7,700 ஏக்கருக்கும் அதிகமான நிலப்பரப்பைப் பல ஆண்டுகளாகப் பயன்படுத்தி வந்துள்ளனர்.

இவற்றில் சுமார் 2,500 ஏக்கருக்கும் அதிகமான செழிப்பான மேய்ச்சல் நிலங்கள் சிங்கள விவசாயிகளால் ஆக்கிரமிக்கப்பட்டுள்ளதாகப் பால் பண்ணையாளர்கள் குற்றஞ்சாட்டி வருகின்றனர்.

கடந்த 2026ஆம் ஆண்டு மே மாதம் 20ஆம் திகதி நடைபெற்ற மட்டக்களப்பு மாவட்ட ஒருங்கிணைப்புக் குழுக் கூட்டத்தில், பால் பண்ணையாளர்களுக்காக 1,570 ஏக்கர் காணிகளை விடுவிக்குமாறு ஜனாதிபதி மகாவலி அபிவிருத்தி அதிகார சபைக்கு அறிவுறுத்தியிருந்தார். இருப்பினும், இதுவரை அந்த நடவடிக்கை நடைமுறைக்கு வரவில்லை எனத் தெரிவிக்கப்படுகிறது.

மேலும், சுமார் 4,000 ஏக்கர் காணிகள் தொடர்பில் மகாவலி அபிவிருத்தி அதிகார சபை மற்றும் வனப் பாதுகாப்புத் திணைக்களம் உரிமை கோரி வரும் நிலையில், எஞ்சியுள்ள 3,500 ஏக்கருக்கும் அதிகமான நிலப்பரப்பை உத்தியோகபூர்வமாக மேய்ச்சல் நிலங்களாக வர்த்தமானியில் அறிவிக்க வேண்டும் என்பதும் பால் பண்ணையாளர்களின் கோரிக்கையாக உள்ளது.

இந்தப் பிரச்சினைக்குத் தீர்வு கோரி தமிழ் பால் பண்ணையாளர்கள் கடந்த 2023ஆம் ஆண்டு செப்டெம்பர் மாதம் மட்டக்களப்பு சித்தாண்டி பாடசாலைக்கு முன்னால் தமது போராட்டத்தை ஆரம்பித்தனர்.

தற்போது மூன்று ஆண்டுகளைக் கடந்துள்ள போதிலும், மேய்ச்சல் நிலங்களைப் பெற்றுக்கொள்வதற்கான கோரிக்கைக்கு நிரந்தரத் தீர்வு கிடைக்காததால், மயிலத்தமடு – மாதவனை பால் பண்ணையாளர்களின் வாழ்வாதாரம் தொடர்ந்தும் பாதிக்கப்பட்டு வருகின்றது.