இலங்கையின் 1990 சுவசெரிய தேசிய அவசர அம்புலன்ஸ் சேவைக்காக 100 புதிய அம்புலன்ஸ்களைப் பெற்றுக்கொள்வது தொடர்பில் இந்தியா மற்றும் இலங்கை இடையே புரிந்துணர்வு ஒப்பந்தம் கைச்சாத்திடப்படவுள்ளது.
இலங்கை அரசாங்கத்தின் விசேட கோரிக்கைக்கு அமைய, முழுமையான மருத்துவ வசதிகளைக் கொண்ட 100 புதிய அம்புலன்ஸ்களை கொள்வனவு செய்வதற்கான நிதி மானியத்தை வழங்க இந்திய அரசாங்கம் இணக்கம் தெரிவித்துள்ளதாக அறிவிக்கப்பட்டுள்ளது.
இதற்கமைய, குறித்த நிதி மானியத்தைப் பெற்றுக்கொள்வதற்காக இந்திய அரசாங்கத்துடன் புரிந்துணர்வு ஒப்பந்தம் ஒன்றைக் கைச்சாத்திடுவதற்கு சுகாதார மற்றும் வெகுஜன ஊடக அமைச்சர் சமர்ப்பித்த யோசனைக்கு அமைச்சரவை அங்கீகாரம் வழங்கியுள்ளது.
குறித்த புரிந்துணர்வு ஒப்பந்தம் நாளை (11) கைச்சாத்திடப்படவுள்ளதாக அமைச்சரவை ஊடகப் பேச்சாளரும் அமைச்சருமான நளிந்த ஜயதிஸ்ஸ தெரிவித்துள்ளார்.
