நாட்டில் நிலவும் சீரற்ற காலநிலை காரணமாக அதிக மழை பெய்து வருவதையடுத்து, மண்சரிவு, வெள்ளப்பெருக்கு உள்ளிட்ட இயற்கை அனர்த்தங்கள் தொடர்பில் மிகுந்த அவதானத்துடன் செயற்படுமாறு தேசிய கட்டிட ஆராய்ச்சி நிறுவனம் (NBRO) பொதுமக்களிடம் கோரிக்கை விடுத்துள்ளது.
அனர்த்தங்களால் ஏற்படக்கூடிய உயிர் மற்றும் சொத்திழப்புகளைக் குறைக்க, உத்தியோகபூர்வ எச்சரிக்கைகளைப் பின்பற்றி அவசரநிலைக்குத் தயாராக இருக்குமாறும் அறிவுறுத்தப்பட்டுள்ளது.
அவசரகாலத் தேவைகளுக்காக மருந்துகள், முக்கிய ஆவணங்கள், உலர் உணவுகள் மற்றும் முதலுதவிப் பொருட்கள் அடங்கிய கைப்பையைத் தயாராக வைத்திருக்க வேண்டும். குடும்பத்தினர் மற்றும் அயலவர்களுக்கும் பாதுகாப்பு நடவடிக்கைகள் குறித்து விழிப்புணர்வு ஏற்படுத்த வேண்டும்.
மேலும், வளிமண்டலவியல் திணைக்களம் மற்றும் அனர்த்த முகாமைத்துவ நிலையத்தின் அறிவிப்புகளைத் தொடர்ந்து அவதானிக்குமாறும், நில வெடிப்புகள், நீர்மட்டத்தில் திடீர் மாற்றங்கள், மரங்கள் முறிந்து விழுதல், சேற்று நீர் கசிவு போன்ற மண்சரிவுக்கான ஆரம்ப அறிகுறிகள் தென்பட்டால் உடனடியாக பாதுகாப்பான இடங்களுக்குச் செல்லுமாறும் NBRO அறிவுறுத்தியுள்ளது.
