மட்டக்களப்பு வாழைச்சேனை கோறளைப்பற்று பிரதேச செயலக பொருளாதார அபிவிருத்தி உத்தியோகத்தர் தாக்கப்பட்டதைக் கண்டித்து நேற்று 17/11 பிரதேச செயலக முன்றலில் உத்தியோகத்தர்களினால் பணிப்பகிஷ்கரிப்பு முன்னெடுக்கப்பட்டது.
பிரதேச செயலகத்தில் கடமையாற்றும் அபிவிருத்தி உத்தியோகத்தர் ஒருவர் நேற்று முன் தினம் நாடு பூராகவும் இடம்பெறும் குடிசன வீட்டு வசதிகள் தொகை மதிப்பு கடமைக்காக கிண்ணையடி கிராம உத்தியோகத்தர் பிரிவுக்கு சென்றிருந்த வேளையில் மதுபோதையில் இருந்த நபரொருவரால் படுமோசமாக தாக்குதலுக்கு உள்ளாகி வாழைச்சேனை ஆதார வைத்தியசாலையில் தொடர்ந்து சிகிச்சை அளிக்கப்பட்டு வருகின்றார்.
இதன் காரணமாக ஆர்ப்பாட்டத்தில் ஈடுபட்ட அபிவிருத்தி உத்தியோகத்தர்கள் தாக்கியவரை உடனடியாக கைது செய், அரசாங்க ஊழியர்களின் கடமைகளுக்கு இடையூறு செய்யாதே, அரச ஊழியர்களின் பாதுகாப்பை உறுதிப்படுத்து போன்ற சுலோகங்களை ஏந்தியவாறும் கோசங்ளை எழுப்பியும் தங்கள் எதிர்ப்பினை தெரிவித்தனர். இதன்போது ஆர்ப்பாட்ட இடத்திற்கு வருகை தந்த வாழைச்சேனை பொலிஸ் நிலைய பொறுப்பதிகாரியிடம் மகஜர் ஒன்றை கையளித்து பொறுப்பதிகாரியால் வழங்கப்பட்ட வாக்குறுதியை அடுத்து கலைந்து சென்று பிரதேச செயலகத்துக்கு தேவை நிமிர்த்தம் வந்து இருந்த பொதுமக்களுக்காக தங்கள் கடமைகளை செய்தார்கள்.
