சட்டவிரோதமான முறையில் இலங்கைக்கு கஞ்சா கொண்டு வந்த பிரித்தானிய பிரஜை ஒருவர் கட்டுநாயக்க விமான நிலைய பொலிஸ் போதைப்பொருள் தடுப்பு பிரிவினரால் நேற்று (8) கைது செய்யப்பட்டுள்ளார்.
கைது செய்யப்பட்டவர் 53 வயதுடைய பிரித்தானிய பிரஜையாவார்.
இவர் நேற்று திங்கட்கிழமை (8) பிற்பகல் 1.30 மணியளவில் லண்டனிலிருந்து கட்டுநாயக்கவை வந்தடைந்துள்ளார்.
சந்தேக நபரிடத்தில் மேற்கொள்ளப்பட்ட விசாரணையில் அவர் கொண்டு வந்த பயணப்பொதியில் இருந்து 8 பொதிகளாக காணப்பட்ட 40 கிராம் நிறையுடைய கஞ்சா மற்றும் 58 கஞ்சா விதைகள் ஆகியன கைப்பற்றப்பட்டுள்ளன.
இவர் எதிர்வரும் மார்ச் மாதம் வரை இலங்கையில் தங்கியிருந்து பயிரிடப்பட்டு கொண்டுவரப்பட்ட கஞ்சா விதைகளை இலங்கையில் விற்பனை செய்யவிருந்ததாக விசாரணையில் தெரியவந்துள்ளன.
இவர் இதற்கு முன்னரும் 700 கிராம் நிறையுடைய கஞ்சாவுடன் கட்டுநாயக்க விமான நிலைய பொலிஸ் போதைப்பொருள் தடுப்பு பிரிவினரால் கைது செய்யப்பட்டு அபராதம் செலுத்தப்பட்டு விடுதலை செய்யப்பட்டுள்ளதாக மேலதிக விசாரணையில் தெரியவந்துள்ளது.
சந்தேக நபர் இன்று செவ்வாய்க்கிழமை (9) நீர்கொழும்பு நீதவான் நீதிமன்றத்தில் ஆஜர்படுத்தப்படவுள்ளதாக பொலிஸ் போதைப்பொருள் தடுப்பு பிரிவினர் தெரிவித்துள்ளனர்.
