முல்லைத்தீவு மாவட்டத்தின் புதுமாத்தளன் பகுதியிலிருந்து நேற்று (26) காலை 07.00 மணியளவில் கடற்றொழிலுக்குச் சென்று காணாமல்போயுள்ள கடற்றொழிலாளர்கள் மூவரையும் கடற்படை மற்றும் விமானப்படை இணைந்து தேடும் நடவடிக்கைகளை தீவிரப்படுத்தியுள்ளனர்.
காணாமல்போன மீனவர்களைக் கண்டுபிடிக்க தேவையான அவசர நடவடிக்கைகளை மேற்கொள்ளுமாறு கடற்றொழில் அமைச்சர் இராமலிங்கம் சந்திரசேகர் சம்பந்தப்பட்ட அதிகாரிகளுக்குப் பணிப்புரை விடுத்துள்ளார்.
தேடுதல் நடவடிக்கைகளை விரைவுபடுத்துவதற்காக பாதுகாப்பு அமைச்சு, இலங்கை கடற்படைத் தளபதி மற்றும் இலங்கை விமானப்படைத் தளபதி ஆகியோருடன் அமைச்சர் கலந்துரையாடல்களை நடத்தியுள்ளார்.
காணாமல்போன மீனவர்கள் முல்லைத்தீவு அம்பலவான்பொக்கணை பகுதியைச் சேர்ந்த அந்தோனி ஜூட் (26), யாழ்ப்பாணத்தைச் சேர்ந்த ஸ்ரீ புஷ்பராஜா (42) மற்றும் மன்னாரைச் சேர்ந்த முஹம்மது ரிஸ்வான் (48) என இனங்காணப்பட்டுள்ளனர்.
சீரற்ற காலநிலை மற்றும் கடற் கொந்தளிப்பு காரணமாக தேடுதல் செயற்பாடுகளுக்கு சவால்கள் ஏற்பட்டுள்ளன. அதனால் இலங்கை விமானப்படையின் ஹெலிகொப்டரை ஈடுபடுத்துவதற்கு ஏற்பாடுகள் செய்யப்பட்டுள்ளதுடன், வான்வழித் தேடுதல் நடவடிக்கைகள் நாளை ஆரம்பிக்கப்படும் என அறிவிக்கப்பட்டுள்ளது.
முல்லைத்தீவு மாவட்ட செயலகம், மாவட்ட அனர்த்த முகாமைத்துவ மையம் , இலங்கை கடற்படை மற்றும் ஏனைய சம்பந்தப்பட்ட நிறுவனங்கள் இணைந்து செயற்படுமாறும் அறிவுறுத்தப்பட்டுள்ளன.
அமைச்சர் சந்திரசேகர் இந்நடவடிக்கைகளை நெருக்கமாகக் கண்காணித்து வருவதுடன், காணாமல்போன மீனவர்களைக் கண்டறிந்து அவர்களைப் பாதுகாப்பாக மீட்பதற்கு கிடைக்கக்கூடிய அனைத்து வளங்களையும் பயன்படுத்துமாறு அதிகாரிகளை வலியுறுத்தியுள்ளதாக மீன்பிடி அமைச்சு வெளியிட்டுள்ள அறிக்கையில் குறிப்பிடப்பட்டுள்ளது.
