மன்னார் ஓலைத்தொடுவாய் கடற்பரப்பில் சட்ட விரோதமாக இரவு நேர கடலட்டை பிடிக்கும் தொழிலில் ஈடுபட்ட 12 பேர் கடற்படையினரால் புதன்கிழமை (17) அதிகாலை கைது செய்யப்பட்டுள்ளனர்.
ஓலைத்தொடுவாய் கடற்பரப்பில் கடற்படையினர் மேற்கொண்ட விசேட தேடுதல் நடவடிக்கையின்போது ஓலைத்தொடுவாய் கடல் பகுதியில், சட்ட விரோதமான முறையில் நீரில் மூழ்கி கடலட்டை பிடித்துக்கொண்டிருந்த வேளையிலேயே இந்த 12 பேரையும் கடற்படையினர் கைது செய்துள்ளனர்.
இதன்போது 4 படகுகள், டைவிங் கருவிகள் மற்றும் சட்ட விரோதமாக பிடிக்கப்பட்ட சுமார் 968 கடலட்டைகள், 34 சங்குகள் கடற்படையினரால் கைப்பற்றப்பட்டன.
கைது செய்யப்பட்டவர்கள் மன்னாரைச் சேர்ந்த 22 வயதுக்கும் 48 வயதுக்கும் இடைப்பட்டவர்கள் ஆவர்.
அத்துடன், கைப்பற்றப்பட்ட கடலட்டைகள் மற்றும் சங்குகள், ஏல விற்பனை ஊடாக விற்கப்பட்ட நிலையில் கைது செய்யப்பட்ட நபர்கள் மற்றும் பொருட்கள் தொடர்பில் மேலதிக சட்ட நடவடிக்கைகளை மன்னார் கடற்றொழில் திணைக்கள அதிகாரிகள் மேற்கொண்டு வருகின்றனர்.
