வரி செலுத்துவோர் அடையாள எண்ணான (TIN) சான்றிதழைப் பெற்றுக்கொள்வதற்காக பொதுமக்கள் உள்நாட்டு இறைவரித் திணைக்கள (IRD) அலுவலகங்களில் நீண்ட வரிசைகளில் காத்திருக்க வேண்டிய அவசியமில்லை என பொருளாதார அபிவிருத்தி பிரதி அமைச்சர் நிஷாந்த ஜயவீர தெரிவித்துள்ளார்.
பொதுமக்களின் சிரமங்களைக் குறைக்கும் வகையில், TIN இலக்கத்தைப் பெற்றுக்கொள்ள மாற்று நடைமுறையொன்று அறிமுகப்படுத்தப்படவுள்ளதாகவும் அவர் குறிப்பிட்டுள்ளார்.
இன்று (03) நாடாளுமன்றத்தில் உரையாற்றிய அவர், TIN சான்றிதழைப் பெறுவது தொடர்பில் பொதுமக்கள் தேவையற்ற அச்சமோ பதற்றமோ அடைய வேண்டியதில்லை என வலியுறுத்தியுள்ளார்.
இதன்படி, சாரதி அனுமதிப்பத்திரம், வருமான அனுமதிப்பத்திரம் பெற்றுக்கொள்ளுதல் மற்றும் வங்கிக் கணக்குகளை ஆரம்பித்தல் உள்ளிட்ட சேவைகளுக்காக TIN சான்றிதழைப் பெறுவதற்கு இனிமேல் நேரடியாக IRD அலுவலகங்களுக்குச் செல்ல வேண்டியதில்லை என அவர் தெரிவித்துள்ளார்.
இந்தப் புதிய நடைமுறை தொடர்பான விசேட அறிவிப்பை உள்நாட்டு இறைவரித் திணைக்களம் விரைவில் வெளியிடவுள்ளதாகவும் குறிப்பிட்டுள்ளார்.
புதிய ஏற்பாட்டின்படி, இதுவரை TIN இலக்கத்தைப் பெற்றுக்கொள்ளாதவர்கள் தாங்கள் சேவையைப் பெற விரும்பும் நிறுவனத்திடம் பின்வரும் விபரங்களைச் சமர்ப்பிக்க முடியும்:
- தேசிய அடையாள அட்டையின் (NIC) நகல்.
- செயற்பாட்டில் உள்ள கையடக்கத் தொலைபேசி இலக்கம்.
- மின்னஞ்சல் முகவரி.
இதனைத் தொடர்ந்து, சம்பந்தப்பட்ட நிறுவனம் விண்ணப்பதாரரின் விபரங்களை IRD திணைக்களத்திற்கு அனுப்பி, தேவையான பதிவுச் செயல்முறைகளை முன்னெடுக்கும்.
பின்னர், விண்ணப்பதாரரின் மின்னஞ்சல் முகவரிக்கு TIN இலக்கம் அல்லது வருமானவரி தொடர்பான சான்றிதழ் அனுப்பி வைக்கப்படும் என பிரதி அமைச்சர் விளக்கமளித்துள்ளார்.
மேலும், ஏற்கனவே TIN இலக்கத்தைப் பெற்றுள்ளவர்களும், இதுவரை பெற்றுக்கொள்ளாதவர்களும் இந்தப் புதிய நடைமுறையைப் பயன்படுத்திக்கொள்ள முடியும் எனவும் தெரிவித்துள்ளார்.
நவம்பர் முதலாம் திகதி முதல் பல்வேறு பரிவர்த்தனைகளுக்கு TIN இலக்கம் கட்டாயமாக்கப்பட்டதைத் தொடர்ந்து, நாடளாவிய ரீதியில் உள்ள IRD அலுவலகங்களில் பொதுமக்கள் நீண்ட வரிசைகளில் காத்திருக்கும் நிலை ஏற்பட்டுள்ளது.
இதனால் ஏற்பட்டுள்ள சிரமங்கள் மற்றும் தாமதங்கள் தொடர்பில் பொதுமக்கள் முறைப்பாடுகளை முன்வைத்து வரும் நிலையில், இந்தப் புதிய அறிவிப்பு வெளியாகியுள்ளது.
