திங்கட்கிழமை (ஜனவரி 22) பெலியத்த பகுதியில் ஐந்து பேர் சுட்டுக் கொல்லப்பட்ட சம்பவம் தொடர்பில் ஒருவர் கைது செய்யப்பட்டுள்ளார்.
சந்தேக நபர் 54 வயதுடைய சமன் குமார என அடையாளம் காணப்பட்டுள்ளார் என பொது பாதுகாப்பு அமைச்சு தெரிவித்துள்ளது.
துப்பாக்கிச் சூட்டுச் சம்பவத்தின் போது சந்தேகநபர் எஸ்யூவி வாகனத்தை ஓட்டிச் சென்றதுடன் கொலைகளைத் திட்டமிட்டுள்ளதாகவும் முதற்கட்ட விசாரணையில் தெரியவந்துள்ளது.
துப்பாக்கிச் சூடு நடத்த பயன்படுத்திய பஜேரோ வாகனத்தையும் கைப்பற்றிய நிலையில், சந்தேக நபர் மாத்தறையில் காவல்துறையினரால் கைது செய்யபட்டுள்ளார்.
பெலியத்த பகுதியில் இடம்பெற்ற துப்பாக்கிச் சூட்டில் எமது மக்கள் கட்சியின் தலைவர் சமன் பெரேரா உட்பட 5 பேர் உயிரிழந்துள்ளனர்.
பெலியத்த பகுதியில் தெற்கு அதிவேக நெடுஞ்சாலையில் இருந்து வெளியேறி சிற்றுண்டி சாப்பிடுவதற்காக நின்றிருந்த டிபென்டரில் பயணித்தவர்களை பின்தொடர்ந்து சென்ற சந்தேக நபர்கள் அவர்கள் மீது துப்பாக்கிச் சூடு நடத்தியுள்ளனர். பின்னர் சந்தேக நபர்கள் அதே எஸ்யூவியில் அங்கிருந்து தப்பிச் சென்றனர்.
கடந்த ஆண்டு தங்காலையில் இடம்பெற்ற மூவர் கொலைச் சம்பவத்தின் பழிவாங்கும் நடவடிக்கையாக சந்தேகிக்கப்படும் துப்பாக்கிச் சூட்டுக்கான காரணத்தை கண்டறிய பொலிஸ் விசாரணைகள் இடம்பெற்று வருகின்றமை குறிப்பிடத்தக்கது.
