இலங்கை மத்திய வங்கி உட்பட, அரசுக்கு சொந்தமான நிறுவனங்களின் நிதி அதிகாரங்களை குறைக்கும் சட்டமூலம் நீதி அமைச்சரால் இந்த மாதம் பாராளுமன்றத்தில் சமர்ப்பிக்கப்படவுள்ளது.
இந்த நடவடிக்கையானது மத்திய வங்கியின் ஊழியர்களின் சம்பளத்தை நிர்ணயிக்கும் அதிகாரத்தை நீக்கி, அந்த அதிகாரம் நிதியமைச்சு மற்றும் பாராளுமன்றத்திடம் வழங்கப்படும் என நீதியமைச்சர் விஜயதாச ராஜபக்ஷ தெரிவித்தார்.
அதன்படி, மத்திய வங்கியின் ஊழியர்களுக்கு அண்மையில் முன்மொழியப்பட்ட சம்பள உயர்வு இரத்து செய்யப்படும் என்றும், ஆனால் நிதி அமைச்சுடன் கலந்தாலோசித்து நியாயமான சம்பள உயர்வு குறித்து பரிசீலிக்கப்படும் என்றும் அவர் கூறினார்.
முன்மொழியப்பட்ட சட்டமூலத்தின் கீழ், அரசுக்கு சொந்தமான நிறுவனங்களுக்கு நிர்வாக அதிகாரங்கள் மற்றும் நிதிக் கொள்கை முடிவெடுக்கும் அதிகாரங்கள் மட்டுமே வழங்கப்படும்.
அவர்களின் சம்பளத்தை அதிகரிப்பதற்கான அதிகாரங்கள் நிறுவனங்களுக்கு வழங்கப்பட மாட்டாது என்றும் அமைச்சர் கூறினார்.
இம்மாதம் முன்வைக்கப்படவுள்ள சட்டமூலத்தின் அடிப்படையில், அரச நிறுவனங்கள் பாராளுமன்ற நிதி அதிகாரங்களை மீறுவதற்கு அனுமதிக்கப்பட மாட்டாது என்று அவர் கூறினார்.
தற்போதுள்ள பிரச்சினைகளில் ஒன்று அரச நிறுவனங்களின் நிதி அதிகாரங்கள் குறித்து சரியான விளக்கம் இல்லை என்றும், அதன் மூலம் அவர்களில் பலர் பாராளுமன்ற அதிகாரங்களை புறக்கணிக்க முயற்சிப்பதாகவும் அவர் கூறினார்.
உத்தேச சட்டமூலம் தொடர்பில் பாராளுமன்றத்தில் உள்ள கட்சித் தலைவர்களுக்கு செவ்வாய்கிழமை விளக்கமளிக்கப்படவுள்ளதுடன், ஏனைய அமைச்சர்களும் பாராளுமன்ற நிதி அதிகாரங்களை பேணுவது தொடர்பான யோசனைகளை சமர்ப்பிக்கவுள்ளனர்.
வெளிநாடுகளில் உள்ள ஏற்றுமதியாளர்கள் நிதியைத் தக்கவைத்துக்கொள்வது, சட்டவிரோத நுண்நிதி நிறுவனங்களின் வியாபாரங்களை நிறுத்துவதற்கான நடவடிக்கைகள், குத்தகை விவகாரங்கள் மற்றும் அடகு வைத்தல் தொடர்பான பிரச்சினைகள் நிலுவையில் இருக்கும் போதே மத்திய வங்கி ஊழியர்களின் சம்பளத்தை அதிகரிக்க நடவடிக்கை எடுக்கப்பட்டுள்ளதாக அமைச்சர் ராஜபக்ஷ தெரிவித்தார்.
