மட்டக்களப்பு- களுவன்கேணி பிரதேசத்தில் கனைக்காலில் கருநாக பாம்பு தீண்டியதில் 76 வயதுடைய மூதாட்டி ஒருவர் உயிரிழந்துள்ளார்.
நேற்று (31) மாலை இச்சம்பவம் இடம்பெற்றுள்ளதாக ஏறாவூர் பொலிஸார் தெரிவித்தனர்.
களுவன்கேணி கிராமத்தைச் சேர்ந்த ஏழு பிள்ளைகளின் தாயான சின்னத்தம்பி கற்பகம் என்பவரே பலியானதாக அடையாளங்காணப்பட்டுள்ளது.
இவர் தனது வீட்டிற்கு அருகில் தனது காணியைத் துப்பரவு செய்து கொண்டிருந்தவேளை குப்பைக்குள் மறைந்திருந்த கருநாக பாம்பு தீண்டிவிட்டதாகக் கூறியுள்ளார். அதிலிருந்து சற்று நேரத்தில் மயங்கியுள்ளார்.
இந்தநிலையில் அவரை சிகிச்சைக்காக செங்கலடி வைத்தியசாலைக்குக் கொண்டு சென்றிருந்த போது உயிரிழந்ததை வைத்தியர்கள் உறுதி செய்துள்ளனர்.
திடீர் மரண விசாரணை அதிகாரி எம்எஸ்எம். நஸிர் மரண விசாரணைகளை மேற்கொண்டதையடுத்து பிரேதம் உடல் கூறு பரிசோனைக்காக மட்டக்களப்பு போதனா வைத்தியசாலைக்கு அனுப்பப்பட்டதுடன்,
ஏறாவூர்ப் பொலிஸார் இச்சம்பவம் தொடர்பான மேலதிக விசாரணைகளை முன்னெடுத்துள்ளனர்.
