எரிவாயு சிலிண்டர்களைப் பதுக்கி வைத்தல், விற்பனையைக் கட்டுப்படுத்துதல் மற்றும் நிர்ணயிக்கப்பட்ட விலையை விட அதிக விலைக்கு விற்பனை செய்தல் போன்ற முறைகேடுகளில் ஈடுபடும் விநியோகஸ்தர்களுக்கு எதிராகக் கடுமையான நடவடிக்கை எடுக்கப்படும் என லிட்ரோ நிறுவனம் எச்சரித்துள்ளது.
இது தொடர்பில் தனது விநியோக வலையமைப்பில் உள்ள அனைத்து அங்கீகரிக்கப்பட்ட விநியோகஸ்தர்களுக்கும் நிறுவனம் விசேட அறிவுறுத்தல்களை வெளியிட்டுள்ளது.
அதன்படி, எரிவாயு சிலிண்டர்களைப் பதுக்கி வைத்தல், விற்பனையைத் திட்டமிட்டு மட்டுப்படுத்துதல், உத்தியோகபூர்வமாக நிர்ணயிக்கப்பட்ட அதிகபட்ச சில்லறை விலையை விட அதிக விலைக்கு விற்பனை செய்தல் மற்றும் அனுமதியற்ற மேலதிக கட்டணங்களை அறவிடுதல் ஆகிய நடவடிக்கைகளில் ஈடுபடக்கூடாது என அறிவுறுத்தப்பட்டுள்ளது.
இந்த அறிவுறுத்தல்களை மீறும் விநியோகஸ்தர்களுக்கு எதிராகக் கடுமையான ஒழுங்கு நடவடிக்கைகள் முன்னெடுக்கப்படும் எனவும் லிட்ரோ நிறுவனம் தெரிவித்துள்ளது.
மேலும், விதிமுறைகளை மீறும் விநியோகஸ்தர்களுடனான விநியோக ஒப்பந்தங்கள் தேவையேற்படின் முழுமையாக இரத்துச் செய்யப்படும் என்றும் எச்சரிக்கை விடுக்கப்பட்டுள்ளது.
நுகர்வோர் எவ்வித தடையுமின்றி, உத்தியோகபூர்வமாக நிர்ணயிக்கப்பட்ட விலையில் லிட்ரோ எரிவாயு சிலிண்டர்களைப் பெற்றுக்கொள்வதை உறுதிப்படுத்தும் நோக்கிலேயே இந்த நடவடிக்கைகள் முன்னெடுக்கப்பட்டுள்ளதாக நிறுவனம் தெரிவித்துள்ளது.
