சட்டவிரோதமாக மதுபானம் விற்பனை செய்பவர்களை இலக்கு வைத்து கொழும்பில் இரண்டு பண்டிகைக் கால நாட்களிலும் விசேட நடவடிக்கையொன்றை முன்னெடுக்க கலால் திணைக்களம் திட்டமிட்டுள்ளது.
கெஸ்பேவ, பாதுக்க, பத்தரமுல்ல மற்றும் கொழும்பு நகரில் உள்ள நான்கு பிரதான கலால் நிலையங்களுடன் இணைந்து கூட்டு நடவடிக்கை ஏற்பாடு செய்யப்பட்டுள்ளதாக கொழும்பு நகரை மேற்பார்வையிடும் உயர் கலால் அதிகாரி நேற்று தெரிவித்தார்.
இதன் விளைவாக ஏப்ரல் 12 மற்றும் 13 ஆம் திகதிகளில் கலால் கட்டளைகளை மீறி மதுபானங்களை விற்பனை செய்யும் சட்டத்தை மீறுபவர்களைத் தேடி 50 க்கும் மேற்பட்ட அதிகாரிகள் பல குழுக்களாக நியமிக்கப்பட்டுள்ளனர்.
புத்தாண்டுக்கு முன்னதாக மதுபானங்களை அதிக அளவில் கையிருப்பில் வாங்கி, கறுப்புச் சந்தையில் அதிக விலைக்கு விற்கும் ஒழுங்கமைக்கப்பட்ட விற்பனையாளர்கள் குறித்து தங்களுக்கு உளவுத்துறை தகவல் கிடைத்துள்ளது என்று அவர் கூறினார்.
மறுவிற்பனை நோக்கத்திற்காக அதிக அளவில் மதுபானங்களை கொண்டு செல்லும் வாகனங்களை கண்காணிப்பு குழுக்கள் சிறப்பாக சோதனை செய்யுமெனவும் , கலால் ஆணையாளர் நாயகம் எம்.ஜே.குணசிறியின் பணிப்புரைக்கமைய கொழும்பு நகரின் உதவி கலால் ஆணையாளர் ஜயந்த சில்வாவினால் இந்த விசேட நடவடிக்கை மேற்கொள்ளப்படுமெனவும் அவர் தெரிவித்தார்.
கலால் சட்டத்தின் விதிகளின் கீழ் குற்றவாளிகள் மீது நடவடிக்கை எடுக்கப்படும் மற்றும் தடை செய்யப்பட்ட காலத்தில் மதுபானம் விற்பனை செய்த உரிமம் பெற்ற உணவகம் அல்லது பார்கள் கண்டறியப்பட்டால், அவர்களின் கலால் உரிமம் ரத்து செய்யப்படும் எனவும் மேலும் தெரிவிக்கப்பட்டுள்ளது.
