யாழிற்கு விஐயம் செய்துள்ள தேசிய மக்கள் சக்தியின் அனுரகுமார திசாநாயக்க தலைமையிலான குழு மற்றும் மாவை சேனாதிராசா தலைமையிலான தமிழரசுக் கட்சியினர் இடையே விசேட சந்திப்பொன்று இடம்பெற்றுள்ளது.
யாழ்ப்பாணம் மார்டின் வீதியிலுள்ள தமிழரசுக் கட்சியின் தலைமை அலுவலகத்தில் நேற்று(11) காலை இச் சந்திப்பு இடம்பெற்றுள்ளது.
இதன் போது பிரதானமாக அதிபர் தேர்தல் உட்பட சமகால அரசியல் நிலைமைகள் எனப் பல்வேறு விடயங்கள் குறித்து கலந்துரையாடப்பட்டது.
இச் சந்திப்பில் தமிழரசுக் கட்சி சார்பில் அதன் தலைவர் மாவை சேனாதிராசா துணைத் தலைவர் சீ.வீ.கே.சிவஞானம், நிர்வாக செயலாளர் குலநாயகம், ஊடகப் பேச்சாளர் ஐனாதிபதி சட்டத்தரணி எம்.ஏ.சுமந்திரன் ஆகியோர் கலந்து கொண்டிருந்தனர்.
அதே போன்று தேசிய மக்கள் சக்தியின் சார்பில் அதன் தலைவர் அனுரகுமார திசாநாயக்க மற்றும் அக் கட்சியின் முன்னாள் நாடாளுமன்ற உறுப்பினர்களான பிமல் ரத்நாயக்கா, இராமலிங்கம் சந்திரசேகரன் உட்பட பலரும் கலந்துகொண்டிருந்தனர்.
இதேவேளை திடீரென எதிர்க்கட்சித் தலைவர் சஜித் பிரேமதாசா தலைமையிலான குழுவினர் நேற்றுமுன்தினம் தினம் தமிழரசுக் கட்சியினரைச் சந்தித்து கலந்துரையாடியிருந்த நிலையில் நேற்றையதினம் தேசிய மக்கள் சக்தியினரும் தமிழரசுக் கட்சியினரை சந்தித்துள்ளமை அரசியலில் பெரும் பரபரப்பை ஏற்படுத்தியுள்ளமை குறிப்பிடத்தக்கது.
