திருகோணமலை நீதிவான் ஒருவருக்கு எதிராக பலாங்கொடை கஸ்ஸப தேரர் ஊடகங்கள் வாயிலாக வெளியிட்ட கருத்துக்களுக்கு திருகோணமலை சட்டத்தரணிகள் சங்கம் கடும் கண்டனம் வெளியிட்டுள்ளது.
இது தொடர்பாக இன்று (13) வெளியிடப்பட்ட அறிக்கையில், நீதிவானுக்கு எதிராக வெளியிடப்பட்ட கருத்துக்கள் தொடர்பில் தமது ஆழ்ந்த கவலையையும் கண்டனத்தையும் தெரிவிப்பதாக சங்கம் குறிப்பிட்டுள்ளது.
நீதித்துறையின் சுதந்திரம் ஜனநாயகத்தினதும் சட்டத்தின் ஆட்சியினதும் அடிப்படைத் தூண் எனச் சுட்டிக்காட்டியுள்ள சங்கம், நீதிபதிகள் மற்றும் நீதிவான்கள் அரசியல், மத அல்லது தனிநபர் அழுத்தங்களுக்கு அடிபணியாமல் சுதந்திரமாகச் செயற்படுவதற்கான சூழல் உறுதிப்படுத்தப்பட வேண்டும் என வலியுறுத்தியுள்ளது.
மேலும், நீதிமன்றத் தீர்ப்புகளில் அதிருப்தி இருப்பின் மேன்முறையீடு உள்ளிட்ட சட்டரீதியான வழிமுறைகளையே நாட வேண்டும் எனவும், மதத் தலைவர்கள் உள்ளிட்ட அனைவரும் சட்டத்தின் முன் சமமானவர்கள் எனவும் தெரிவித்துள்ளது.
நீதித்துறையின் சுதந்திரத்திற்குப் பாதிப்பை ஏற்படுத்தும் அச்சுறுத்தல்கள் மற்றும் தலையீடுகளை வன்மையாகக் கண்டித்துள்ள சங்கம், சம்பவம் தொடர்பில் சட்டத்திற்கு அமைவான உரிய நடவடிக்கைகளை எடுக்குமாறு சம்பந்தப்பட்ட அதிகாரிகளிடம் கோரிக்கை விடுத்துள்ளது.
