குற்றச் செயல்களை ஒழிக்கும் நோக்குடன் பொலிஸ் மாஅதிபரின் விசேட உத்தரவின் பேரில் நாடு முழவதிலும் நேற்றுமுன்தினம் இரவுடன் பொலிசாரினால் மேற்கொள்ளப்பட்டுவரும் திடீர் சுற்றிவளைப்பின்போது காத்தான்குடி பொலிசார் நடாத்திய திடீர் சுற்றிவளைப்பில் ஐஸ் வியாபாரியொருவர் ஒரு தொகை ஐஸ் போதைப் பொருளுடன் கைது செய்யப்பட்டுள்ளதாக காத்தான்குடி பொலிஸ் நிலைய குற்றத்தடுப்பு பிரிவு பொறுப்பதிகாரி எம்.எஸ்.ஏ.றஹீம் தெரிவித்தார்.
நேற்று முன்தினம் இரவு 9.00 மணியளவில் காத்தான்குடி பொலிஸ் பிரிவிற்குட்பட்ட ஆரையம்பதி பிரதான வீதியில் வாகன உதிரிப்பாக வர்த்தக நிலையமொன்றில் வைத்து விற்பனைக்காக சிறிய பொதிசெய்யப்பட்டுக் கொண்டிருந்த நிலையில் பொலிசார் குறித்த சந்தேக நபரைக் கைது செய்துள்ளதாக மேலும் தெரிவித்தனர். கைது செய்யப்பட்ட நபரிடமிருந்து 6920 மில்லி கிராம் ஐஸ் போதைப் பொருள் கைப்பற்றப்பட்டுள்ளதுடன் குறித்த ஐஸ் போதைப் பொருளை பாவிக்கும் கருவியும் கைப்பற்றப்பட்டுள்ளது.
கைதான நபர் ஒல்லிக்குளத்தைச் சேர்ந்தவர் எனவும் பொலிசார் மேலதிக விசாரணைகளை மேற்கொண்டுள்ளதாகவும் பொலிசார் தெரிவித்தனர்.
