வடகிழக்கு ஆபிரிக்க நாடான ஜிபூட்டி அருகேயுள்ள செங்கடலில் அகதிகள் படகு கவிழ்ந்ததில் 45 பேர் உயிரிழந்துள்ளதாக வெளிநாட்டு ஊடகங்கள் தெரிவிக்கின்றன.
இது குறித்து புலம் பெயர்வோர் நலனுக்கான ஐ.நா. பிரிவு வெளியிட்டுள்ள எக்ஸ் பதிவில் தெரிவிக்கப்பட்டுள்ளதாவது,
ஜிபூட்டி கடலோரப் பகுதியில் அகதிகளை ஏற்றிச் சென்ற படகு கவிழ்ந்து மூழ்கியதில் அதிலிருந்த 45 பேர் உயிரிழந்தனர். 310 பேருடன் அந்தப் படகு யேமனிலிருந்து புறப்பட்டது. விபத்திலிருந்து 32 பேர் மீட்கப்பட்டனர் என்று அந்தப் பதிவில் தெரிவிக்கப்பட்டுள்ளது.
ஜிபூட்டி கடலோர காவல் படை வெளியிட்டுள்ள அறிக்கையில், ‘வடகிழக்கு பிராந்தியமான கோர் ஆங்கர் கடற்கரைக்கு 150 மீட்டர் தொலைவில் அகதிகள் படகு கவிழ்ந்து விபத்துக்குள்ளானது. அந்தப் படகிலிருந்த 115 பேர் மீட்கப்பட்டுள்ளனர். எஞ்சியவர்களைத் தேடும் பணி தொடர்ந்து நடைபெற்றுவருகிறது’ என்று தெரிவிக்கப்பட்டுள்ளது.
ஆபிரிக்கா மற்றும் மத்திய கிழக்கு நாடுகளில் இருந்து ஆண்டுதோறும் ஆயிரக்கணக்கானவர்கள் ஐரோப்பிய நாடுகளில் அடைக்கலம் பெறுவதற்காக தங்கள் உயிரை பணயம் வைத்து ஆபத்தான பயணத்தை மேற்கொண்டுவருகின்றனர். அவர்களை அகதிகள் கடத்தல்காரர்கள் பாதுகாப்பற்ற படகுகளில் அளவுக்கு அதிகமாக ஏற்றி அழைத்துச் செல்வதால் அவ்வப்போது விபத்துகள் ஏற்பட்டு ஏராளமானோர் உயிரிழக்கும் சம்பவங்கள் தொடர்ந்து நடைபெற்றுவருகின்றன.
