மிரிஹானவில் இலக்கத்தகடு அற்ற நிலையில் மீட்கப்பட்ட கார் தனது மனைவிக்கு சொந்தமானது என தெரிவிக்கப்படுவதை முன்னாள் இராஜாங்க அமைச்சர் லொகான் ரத்வத்தை நிராகரித்துள்ளதாக தகவல் வெளியாகியுள்ளது.
சமீபத்தில் கண்டியில் தற்கொலை செய்து கொண்ட தனது செயலாளரே அந்த காரை இலங்கைக்கு கொண்டுவந்தார் என முன்னாள் இராஜாங்க அமைச்சர் மேலும் தெரிவித்துள்ளார்
தற்கொலை செய்துகொண்ட நபர் எனக்கு தெரியாமல் அந்த வாகனத்தை இலங்கைக்கு கொண்டுவந்தார் எனவும் தனக்கு வாகனத்தின் உரிமையாளரை தெரியாது எனவும் லொகான் ரத்வத்தை குறிப்பிட்டுள்ளார்.
அதாவது லொகான் ரத்வத்தையின் மனைவியின் இல்லத்தில் சனிக்கிழமை (26) பதிவு செய்யப்படாத வாகனமொன்றை மிரிஹான தலைமையக காவல்துறையினர் மீட்டுள்ளனர்.
இந்த நிலையில் அந்த வாகனம் குறித்து விசாரணை செய்தவேளையே அது லொகான் ரத்வத்தையின் மனைவியின் வீடு என்பது காவல்துறையினருக்கு தெரியவந்துள்ளதாக தகவல்கள் வெளியாகியுள்ளன.
இதேவேளை இது தொடர்பில் நுகேகொடை நீதவான் நீதிமன்றில் முறைப்பாடு செய்ததை தொடர்ந்து பிரதேச குற்றத்தடுப்புப் புலனாய்வுப் பிரிவு அதிகாரிகள் மற்றும் கைரேகை பதிவுப் பிரிவின் அதிகாரிகள் வந்து விசாரணைகளை மேற்கொண்டுள்ளமை குறிப்பிடத்தக்கது.
