தேசிய கல்வி நிறுவனத்தினால் (NIE) தயாரிக்கப்பட்ட 6 ஆம் தர ஆங்கில மொழிப் பாடத்திற்கான கற்றல் தொகுதியில் (Module), பொருத்தமற்ற மற்றும் ஆபாசமான இணையத்தளமொன்றின் பெயர் உள்ளடக்கப்பட்டுள்ளதாக அதிர்ச்சித் தகவல் வெளியாகியுள்ளது.
பாடப்புத்தகத்தில் உள்ள ஒரு பக்கத்தில் மாணவர்களுக்கான மேலதிக வாசிப்புக்காக வழங்கப்பட்டிருந்த இணையத்தள முகவரி, ஆபாசமான உள்ளடக்கங்களைக் கொண்ட ஒரு தளத்திற்கு இட்டுச் செல்வதாகப் பெற்றோர்கள் மற்றும் ஆசிரியர்களால் முறைப்பாடு செய்யப்பட்டது.
இது தொடர்பான ஆரம்பகட்ட ஆய்வுகளில், வழங்கப்பட்ட இணைய முகவரி தவறானது மற்றும் மாணவர்களுக்குப் பொருத்தமற்றது என்பது உறுதிப்படுத்தப்பட்டுள்ளது.
குறித்த கற்றல் தொகுதியை மாகாண ரீதியாக விநியோகிக்கும் பணிகள் உடனடியாக இடைநிறுத்தப்பட்டுள்ளன.
இந்தத் தவறு தற்செயலாக நடந்ததா அல்லது திட்டமிட்டு செய்யப்பட்டதா என்பது குறித்து தேசிய கல்வி நிறுவனம் (NIE) விரிவான விசாரணைகளை ஆரம்பித்துள்ளது. இச்சம்பவம் தொடர்பில் இன்று (31) கல்வி அமைச்சின் செயலாளர் நாலக கலுவெவ குற்றப் புலனாய்வுத் திணைக்களத்தில் முறைப்பாடு செய்துள்ளார்.
வெளித்தரப்பு ஒன்றினால் சதித்திட்ட அடிப்படையில் இவ்வாறான கருத்துக்கள் உள்வாங்கப்பட்டுள்ளதாக தாம் சந்தேகிப்பதாக நாலக கலுவெவ ஊடகங்களிடம் தெரிவித்தார்.
இவ்வாறான முறையற்ற செயலைச் செய்த நபர்கள் குறித்து உடனடியாக விசாரணைகளை முன்னெடுக்குமாறு அவர் குற்றப் புலனாய்வுத் திணைக்களத்திடம் கோரிக்கை விடுத்துள்ளார்.
குறித்த வெளியீடு இன்னும் இறுதிப் பதிப்பாக அச்சிடப்படவில்லை என்றும், இதன் பொறுப்பு கல்வித் திணைக்களத்தையே சாரும் என்றும் அவர் குறிப்பிட்டார்.
இந்த சர்ச்சைக்குரிய பகுதி சட்டபூர்வமாக வெளியிடப்படவில்லை என்பதையும், பாடத்திட்டத்தில் இது எவ்விதத்திலும் உத்தியோகபூர்வமாக உள்வாங்கப்படாது என்பதையும் செயலாளர் கலுவெவ உறுதிப்படுத்தினார்.
