இலங்கையில் தடைசெய்யப்பட்ட பிரமிட் திட்டங்களின் பட்டியலில் மேலும் மூன்று நிறுவனங்கள் இணைக்கப்பட்டுள்ளதுடன், மொத்த எண்ணிக்கை 27 ஆக அதிகரித்துள்ளதாக இலங்கை மத்திய வங்கி அறிவித்துள்ளது.
மத்திய வங்கி இன்று (28) வெளியிட்ட அறிக்கையில், Max App Media Ltd. மற்றும் அதனுடன் தொடர்புடைய Max LK (Pvt) Ltd. மற்றும் Max Media Lanka (Pvt) Ltd. ஆகிய நிறுவனங்கள் தடைசெய்யப்பட்ட பிரமிட் திட்டத்தில் ஈடுபட்டுள்ளமை விசாரணைகளின் மூலம் கண்டறியப்பட்டுள்ளதாகத் தெரிவித்துள்ளது.
1988ஆம் ஆண்டின் 30ஆம் இலக்க வங்கிச் சட்டத்தின் 83(C) பிரிவின் கீழ் இந்தத் தீர்மானம் எடுக்கப்பட்டுள்ளது.
இதன்படி, குறித்த மூன்று நிறுவனங்களும் மத்திய வங்கியின் தடைசெய்யப்பட்ட பிரமிட் திட்டங்களின் பட்டியலில் சேர்க்கப்பட்டுள்ளன. இதனையடுத்து, இவ்வாறான திட்டங்களுடன் தொடர்புடைய நிறுவனங்கள் மற்றும் செயலிகளின் மொத்த எண்ணிக்கை 27 ஆக உயர்ந்துள்ளது.
ஏற்கனவே, Tiens Lanka Health Care, Best Life International, Sport Chain, OnmaxDT, MTFE, Fastwin, Qnet/Questnet, Ledger Block, Beecoin App மற்றும் TM App உள்ளிட்ட பல நிறுவனங்களும் செயலிகளும் இந்தப் பட்டியலில் இடம்பெற்றுள்ளன.
தடைசெய்யப்பட்ட பிரமிட் திட்டங்கள் தொடர்பான புதுப்பிக்கப்பட்ட பட்டியலை மத்திய வங்கியின் நிதி நுகர்வோர் உறவுகள் திணைக்களம் பொதுமக்களின் கவனத்திற்காக வெளியிட்டுள்ளது.
