இன்று மாலை ஹொரணை, பட்டகொட – கல்பாத பகுதியில் அமைந்துள்ள முதியோர் இல்லம் ஒன்றில் ஏற்பட்ட பாரிய தீ விபத்தில் பலர் பாதிக்கப்பட்டுள்ளனர். தீ விபத்து ஏற்பட்ட வேளையில் இல்லத்தில் தங்கியிருந்த முதியவர்களை பாதுகாப்பாக வெளியேற்ற மீட்புப் பணியாளர்கள் மற்றும் பொலிஸார் அவசர நடவடிக்கைகளை முன்னெடுத்தனர்.
தொடக்க தகவல்களின் படி, தீ பரவியபோது அங்கிருந்த சமையல் எரிவாயு சிலிண்டர் வெடித்ததாக கூறப்படுவதால், தீ மேலும் வேகமாக பரவியுள்ளதாக தெரிவிக்கப்படுகிறது. சம்பவ இடத்துக்கு பல தீயணைப்பு பிரிவுகள் விரைந்து சென்று தீயைக் கட்டுப்படுத்தும் பணிகளில் ஈடுபட்டன.
தீ விபத்திற்குப் பின்னர் முன்னெடுக்கப்பட்ட மீட்பு நடவடிக்கைகளில் 51 பேர் பாதுகாப்பாக மீட்கப்பட்டுள்ளனர். மேலும் எட்டு பேர் காயமடைந்த நிலையில் மருத்துவமனைகளில் அனுமதிக்கப்பட்டு சிகிச்சை பெற்று வருகின்றனர்.
அதேசமயம், தீப்பிடித்த கட்டிடத்தின் இடிபாடுகளுக்குள் மேற்கொள்ளப்பட்ட தேடுதல் நடவடிக்கைகளின் போது ஒன்பது பேரின் சடலங்கள் மீட்கப்பட்டுள்ளதாக அதிகாரிகள் உறுதிப்படுத்தியுள்ளனர். காணாமல் போயுள்ளதாக கருதப்படும் சிலரைத் தேடும் பணிகளும் தொடர்ந்து இடம்பெற்று வருகின்றன.
தீ விபத்திற்கான சரியான காரணம் இதுவரை உறுதிப்படுத்தப்படாத நிலையில், சம்பவம் தொடர்பாக பொலிஸார் மற்றும் சம்பந்தப்பட்ட அதிகாரிகள் விரிவான விசாரணைகளை ஆரம்பித்துள்ளனர். இந்த துயரச் சம்பவம் அப்பகுதி மக்களிடையே பெரும் சோகத்தையும் அதிர்ச்சியையும் ஏற்படுத்தியுள்ளது.
