ரோட்டரி இயக்கத்தின் உலகளாவிய கொள்கையான “தன்னலமற்ற சேவை” (Service Above Self) என்ற நோக்கத்தை அடிப்படையாகக் கொண்டு, மட்டக்களப்பு மாவட்ட மாணவர்களின் உளவள மற்றும் சமூக முன்னேற்றத்தை இலக்காகக் கொண்ட விசேட உளநல மேம்பாட்டு செயலமர்வு ஒன்று வெற்றிகரமாக நடத்தப்பட்டது.
Rotary Club of Batticaloa Heritage அமைப்பின் ஏற்பாட்டில் நடைபெற்ற “மாணவர்களை உளவளத்தின் மூலம் வலுப்படுத்துதல்” எனும் தலைப்பிலான இரு நாள் விழிப்புணர்வு மற்றும் பயிற்சிப் பட்டறை, கடந்த ஜூன் 13 மற்றும் 14 ஆம் திகதிகளில் முனைக்காடு சமூக வள நிலையத்தில் இடம்பெற்றது.
மாணவர்களின் உணர்ச்சி நிலைத்தன்மை, தன்னம்பிக்கை மற்றும் நேர்மறை மனநலத்தை மேம்படுத்துவதை நோக்கமாகக் கொண்டு இந்த செயலமர்வு வடிவமைக்கப்பட்டிருந்தது.
விரிவுரைகளுக்கு அப்பாற்பட்டு, மாணவர்களின் செயற்பாட்டு பங்கேற்பை ஊக்குவிக்கும் வகையில் குழுச் செயற்பாடுகள், கலந்துரையாடல்கள், அனுபவப் பகிர்வுகள் மற்றும் விழிப்புணர்வு அமர்வுகளும் நிகழ்ச்சித் திட்டத்தில் இடம்பெற்றிருந்தன.
கல்வியாளர்கள் மற்றும் மனநல நிபுணர்களின் வழிகாட்டுதலுடன் நடைபெற்ற இந்த அமர்வுகள், மாணவர்களின் உளவள திறன்களை மேம்படுத்துவதற்கான பயனுள்ள தளமாக அமைந்ததாக ஏற்பாட்டாளர்கள் தெரிவித்தனர்.
செயலமர்வில் பங்கேற்ற அனைத்து மாணவர்களுக்கும் நிறைவுநாளில் சான்றிதழ்கள் வழங்கப்பட்டன.
கல்வி, சுகாதாரம் மற்றும் மனிதநேய சேவைகள் உள்ளிட்ட பல்வேறு துறைகளில் தொடர்ந்து சமூகப் பணிகளை முன்னெடுத்து வரும் Rotary Club of Batticaloa Heritage, இந்நிகழ்வின் ஊடாக மட்டக்களப்பு மாவட்ட மாணவர்களின் எதிர்கால வளர்ச்சி மற்றும் நலனில் தங்களின் அர்ப்பணிப்பை மீண்டும் உறுதிப்படுத்தியுள்ளது.
