இலங்கை கிரிக்கெட் அணியின் முன்னாள் நட்சத்திர வேகப்பந்து வீச்சாளர் லசித் மாலிங்க, யாழ்ப்பாணம் புனித ஜோன் கல்லூரியின் இளம் கிரிக்கெட் வீரரான குகதாஸ் மாதுலன் குறித்து தனது உத்தியோகபூர்வ முகநூல் பக்கத்தில் விசேட பதிவொன்றை பகிர்ந்துள்ளார்.
அந்த பதிவில்,
குகதாஸ் மாதுலன் திடீரென வானத்திலிருந்து குதித்து ‘ஏ’ அணிக்குள் வரவில்லை எனவும், அவர் இந்த விளையாட்டுக் கட்டமைப்புக்குள் உள்வாங்கப்பட்டு நீண்டகாலமாக உழைத்து வருகிறார் என்பது தகுதியானவர்களுக்குத் தெரியும் எனவும் மாலிங்க குறிப்பிட்டுள்ளார்.
அத்துடன், அவர் 19 வயதுக்குட்பட்ட இலங்கை அணியில் விளையாடவில்லை என்றும், கிரிக்கெட் நிறுவனத்தின் பயிற்றுவிப்பாளர்கள் அவரைப் பற்றி அறிந்திருக்கவில்லை என்றும் பலர் நினைக்கக்கூடும், ஆனால் அவரது திறமை நீண்டகால முயற்சியின் பலனாகும்.
அடுத்து வரவிருக்கும் சர்வதேச டி20 மற்றும் ஒருநாள் போட்டிகளுக்கான இலங்கை அணியில் இவர் கண்டிப்பாகத் தேர்ந்தெடுக்கப்பட வேண்டிய ஒரு முக்கிய வீரர் என மாலிங்க வலியுறுத்தியுள்ளார்.
மேலும், ஒரு வேகப்பந்து வீச்சாளருக்கு 19 முதல் 21 வயதுக்குட்பட்ட காலப்பகுதியே மிகச் சிறந்த வயதாகும் எனக் குறிப்பிட்டுள்ள அவர், இந்த இளம் வீரரின் எதிர்காலப் பயணத்தை எதிர்பார்த்துக் காத்திருப்பதாகவும் தெரிவித்துள்ளார்.
