2026 ஆம் ஆண்டிற்கான உலகின் சிறந்த தீவு சுற்றுலாத் தலங்களின் பட்டியலில் இலங்கை முதலிடத்தைப் பெற்றுள்ளதாக சர்வதேச சுற்றுலா ஊடகமான Big 7 Travel வெளியிட்டுள்ள அண்மைய தரவரிசை அறிக்கையில் தெரிவிக்கப்பட்டுள்ளது.
இயற்கை அழகு, பல்லுயிர் பெருக்கம், கலாசார பாரம்பரியம், சுற்றுலா அனுபவங்களின் தரம் மற்றும் உலகளாவிய பிரபலம் உள்ளிட்ட பல்வேறு அளவுகோல்களின் அடிப்படையில் இந்த தரவரிசை தயாரிக்கப்பட்டுள்ளது.
இதன்படி, உலகின் முன்னணி தீவு சுற்றுலாத் தலங்களாக நீண்டகாலமாக விளங்கிய கிரீஸ், போர்த்துக்கல், அயர்லாந்து மற்றும் தாய்லாந்து உள்ளிட்ட நாடுகளை பின்னுக்குத் தள்ளி இலங்கை முதலிடத்தைப் பிடித்துள்ளது.
இலங்கையின் செழுமையான பல்லுயிர் பெருக்கம், வளமான கலாசார மரபு மற்றும் குறுகிய நிலப்பரப்பிற்குள் கடற்கரை, மலைநாடு, வனவிலங்கு, வரலாற்றுச் சின்னங்கள் உள்ளிட்ட பல்வேறு சுற்றுலா அனுபவங்களை பெற்றுக்கொள்ளும் வாய்ப்பு ஆகியவை இந்த அங்கீகாரத்திற்கு முக்கிய காரணங்களாக அமைந்துள்ளதாக அறிக்கையில் குறிப்பிடப்பட்டுள்ளது.
மேலும், இயற்கை, கலாசாரம், வனவிலங்கு மற்றும் எளிதான பயண வசதிகளை ஒரே சுற்றுப்பயணத்தில் அனுபவிக்கக்கூடிய நாடுகளின் மீது உலகளாவிய சுற்றுலாப் பயணிகளின் ஆர்வம் அதிகரித்து வரும் நிலையில், இலங்கை சர்வதேச தீவு சுற்றுலாத்துறையில் புதிய மைல்கல்லை எட்டியுள்ளதாகவும் அந்த மதிப்பீட்டில் சுட்டிக்காட்டப்பட்டுள்ளது.
