புகையிலை கலந்த வெற்றிலைப் பாக்கு மற்றும் அதனுடன் தொடர்புடைய மெல்லும் புகையிலைப் பொருட்களை விற்பனை செய்தல், விநியோகித்தல் மற்றும் காட்சிப்படுத்துதல் தொடர்பாக நாடு முழுவதும் சட்ட அமலாக்க நடவடிக்கைகள் தீவிரப்படுத்தப்பட்டுள்ளதாக இலங்கை பொது சுகாதார பரிசோதகர்கள் சங்கம் தெரிவித்துள்ளது.
இலங்கையில் பதிவாகும் முக்கிய புற்றுநோய் வகைகளில் வாய் புற்றுநோய் அதிகமாக காணப்படுவதால், புகையிலை கலந்த வெற்றிலைப் பாக்கு பயன்பாட்டைக் கட்டுப்படுத்துவதில் கூடுதல் கவனம் செலுத்தப்பட்டுள்ளதாக சங்கம் குறிப்பிட்டுள்ளது.
இது குறித்து கருத்து தெரிவித்த சங்கத்தின் பொருளாளர் எம்.ஏ.சி. பிரசாத், புகையிலை கலந்த வெற்றிலைப் பாக்கு மற்றும் பிற மெல்லும் புகையிலைப் பொருட்களின் பயன்பாடே வாய் புற்றுநோய் ஏற்படுவதற்கான முக்கிய காரணிகளில் ஒன்றாக இருப்பதாக தெரிவித்துள்ளார்.
மேலும், இலங்கையில் நடைமுறையில் உள்ள சட்டங்களின்படி வெற்றிலைப் பாக்கில் புகையிலை சேர்த்து விற்பனை செய்வது அனுமதிக்கப்படவில்லை என்றும், அத்தகைய பொருட்களை விற்பனை செய்தல், விநியோகித்தல், கைவசம் வைத்திருத்தல், விற்பனைக்காக காட்சிப்படுத்துதல் அல்லது சேமித்து வைத்திருத்தல் ஆகிய அனைத்தும் சட்டப்படி தண்டனைக்குரிய குற்றங்களாகும் என்றும் அவர் வலியுறுத்தியுள்ளார்.
பொதுமக்களின் சுகாதாரத்தைப் பாதுகாக்கும் நோக்கில், நாடு முழுவதும் பொது சுகாதார பரிசோதகர்கள் தொடர்ச்சியான சோதனைகள் மற்றும் சுற்றிவளைப்புகளை மேற்கொண்டு வருவதாகவும் அவர் தெரிவித்துள்ளார்.
இதனால், புற்றுநோய் அபாயத்திலிருந்து பாதுகாப்பாக இருக்க பொதுமக்கள் புகையிலை கலந்த வெற்றிலைப் பாக்கு உள்ளிட்ட மெல்லும் புகையிலைப் பொருட்களைத் தவிர்க்க வேண்டும் என்றும், கடை உரிமையாளர்கள் மற்றும் வர்த்தகர்கள் சட்டத்தைப் பின்பற்றி இத்தகைய பொருட்களை விற்பனை செய்யாமல் இருக்க வேண்டும் என்றும் இலங்கை பொது சுகாதார பரிசோதகர்கள் சங்கம் கேட்டுக்கொண்டுள்ளது.
