தனியார் மருத்துவ ஆய்வுகூடமொன்று, முழுமையான இரத்தப் பரிசோதனை (Full Blood Count – FBC) ஒன்றிற்காக நிர்ணயிக்கப்பட்ட அதிகபட்சக் கட்டணத்தை மீறி ரூ.550 வசூலித்த சம்பவம் தொடர்பில், யாழ்ப்பாண நீதவான் நீதிமன்றம் அந்த நிறுவனத்திற்கு ரூ.30 இலட்சம் (3 மில்லியன் ரூபாய்) அபராதம் விதித்துள்ளது.
பாவனையாளர் அலுவல்கள் அதிகாரசபை மேற்கொண்ட விசேட சுற்றிவளைப்பின் போது, யாழ்ப்பாணம், பலாலி வீதி, கந்தர்மடம் பகுதியில் அமைந்துள்ள தனியார் மருத்துவ ஆய்வுகூடம், FBC பரிசோதனைக்காக அனுமதிக்கப்பட்ட ரூ.400-ஐ விட ரூ.150 அதிகமாக அறவிட்டது உறுதிப்படுத்தப்பட்டது.
இதையடுத்து, குறித்த நிறுவனத்திற்கு எதிராக பாவனையாளர் அலுவல்கள் அதிகாரசபை யாழ்ப்பாண நீதவான் நீதிமன்றத்தில் வழக்குத் தொடர்ந்தது. விசாரணையின்போது, நிறுவனம் குற்றச்சாட்டை ஒப்புக்கொண்டதையடுத்து, ரூ.30 இலட்சம் அபராதம் விதிக்கப்பட்டதுடன், செய்த தவறை தனது சொந்தச் செலவில் பிரதான நாளிதழ்களில் அறிவிப்பாக வெளியிடவும் நீதிமன்றம் உத்தரவிட்டது.
இதனையடுத்து, தனியார் மருத்துவமனைகள் மற்றும் மருத்துவ ஆய்வுகூடங்களில் சிகிச்சை அல்லது பரிசோதனைகளைப் பெறும் பொதுமக்கள், அரசு நிர்ணயித்துள்ள அதிகபட்சக் கட்டணங்களை அறிந்து செயல்படுமாறு பாவனையாளர் அலுவல்கள் அதிகாரசபை அறிவுறுத்தியுள்ளது.
மேலும், எந்தவொரு சேவைக்கும் பணம் செலுத்தும் போது கட்டாயமாக ரசீது அல்லது பற்றுச்சீட்டைப் பெற்றுக்கொள்ள வேண்டும் என்றும், அது எதிர்காலத்தில் முக்கிய ஆதாரமாக பயன்படும் என்றும் அதிகாரசபை வலியுறுத்தியுள்ளது.
அதிகபட்சக் கட்டணத்தை மீறி பணம் அறவிடப்பட்டால், அலுவலக நேரங்களில் 1977 என்ற அவசர தொலைபேசி இலக்கத்தின் மூலம் பாவனையாளர் அலுவல்கள் அதிகாரசபைக்கு பொதுமக்கள் முறைப்பாடு செய்யலாம் எனவும் அறிவிக்கப்பட்டுள்ளது.
