அரச பல்கலைக்கழக அமைப்பில் நிலவும் கடுமையான நெருக்கடிகளுக்கு எதிர்ப்புத் தெரிவிக்கும் வகையில், நாளை (09) ஒரு நாள் அடையாள வேலைநிறுத்தப் போராட்டத்தில் ஈடுபடத் தீர்மானித்துள்ளதாகப் பல்கலைக்கழக ஆசிரியர் சங்கங்களின் சம்மேளனம் தெரிவித்துள்ளது.
இது தொடர்பில் கருத்துத் தெரிவித்த அச்சங்கத்தின் செயலாளர், சிரேஷ்ட விரிவுரையாளர் சாருதத்த இலங்கசிங்க, கடந்த வாரம் முழுவதும் தமது சங்கம் தொழிற்சங்க நடவடிக்கைகளில் ஈடுபட்டிருந்ததாகக் குறிப்பிட்டார்.
அரசுப் பல்கலைக்கழகங்களில் விரிவுரையாளர்களின் பற்றாக்குறையும், தகுதியான விரிவுரையாளர்கள் இல்லாமையும் கடுமையான பிரச்சினையாக உருவெடுத்துள்ளதாக அவர் சுட்டிக்காட்டினார். இதன் காரணமாக, 2025 உயர்தரப் பரீட்சைக்குத் தோற்றிய மாணவர்களை அரசுப் பல்கலைக்கழகங்களில் சேர்த்துக்கொள்ள முடியாத நிலை தற்போது ஏற்பட்டுள்ளதாகவும் அவர் தெரிவித்தார்.
ஜனாதிபதி புதிதாக 50 அரசுப் பல்கலைக்கழகங்களை உருவாக்கப் போவதாக அறிவித்திருந்த போதிலும், அவற்றை நிறுவுவதற்கு முன்னர் தற்போதுள்ள 17 பல்கலைக்கழகங்களின் தரத்தைப் பேணிப் பாதுகாப்பதே மிக முக்கியமானது என அவர் வலியுறுத்தினார்.
இந்நெருக்கடி தொடர்பில் அரசுடன் கலந்துரையாடுவதற்குத் தமது சம்மேளனம் எதிர்பார்ப்பதாகவும், இதற்கு நிலையான தீர்வு காணப்பட வேண்டியது அவசியம் எனவும் சாருதத்த இலங்கசிங்க மேலும் தெரிவித்தார்.
