போதைப்பொருள் கடத்தல் மூலம் சட்டவிரோதமாகப் பெறப்பட்டதாக சந்தேகிக்கப்படும் சுமார் 475 இலட்சம் ரூபாய் பெறுமதியான சொத்துக்கள் மற்றும் வாகனங்களை 14 நாட்களுக்கு முடக்குவதற்கு சட்டவிரோத சொத்துக்கள் விசாரணைப் பிரிவு நடவடிக்கை எடுத்துள்ளது.
பதவிய – பராக்கிரமபுர பகுதியைச் சேர்ந்த நபர் ஒருவர் போதைப்பொருள் கடத்தல் மூலம் சட்டவிரோதமாக சொத்துக்களை சேர்த்துள்ளதாக குற்றப் புலனாய்வுத் திணைக்களத்துக்கு கிடைத்த முறைப்பாடு, பொலிஸ் மா அதிபரால் சட்டவிரோத சொத்துக்கள் விசாரணைப் பிரிவுக்கு அனுப்பி வைக்கப்பட்டதாக தெரிவிக்கப்பட்டுள்ளது.
இதனையடுத்து மேற்கொள்ளப்பட்ட விசாரணைகளில், குறித்த நபர் சட்டவிரோதமாக ஈட்டிய பணத்தைப் பயன்படுத்தி காணிகள், கட்டிடங்கள் மற்றும் வாகனங்களை கொள்வனவு செய்துள்ளதாக தகவல்கள் வெளியாகியுள்ளன.
முடக்கப்பட்டுள்ள சொத்துக்களில், அவரது மனைவியின் பெயரில் புதிய நகர், பதவிய பகுதியில் கொள்வனவு செய்யப்பட்ட சுமார் 275 இலட்சம் ரூபாய் பெறுமதியான 15 பேர்ச்சஸ் காணியும், அதில் அமைக்கப்பட்டுள்ள இருமாடிக் கட்டிடமும் அடங்குகின்றன.
அத்துடன், அனுராதபுரம் விஜயபுர பகுதியில் சுமார் 120 இலட்சம் ரூபாய் பெறுமதியான 15 பேர்ச்சஸ் காணி மற்றும் அதில் அமைந்துள்ள வீடு, சுமார் 65 இலட்சம் ரூபாய் பெறுமதியான வேன் மற்றும் சுமார் 15 இலட்சம் ரூபாய் பெறுமதியான சிறிய லொறி ஆகியவையும் விசாரணைகளில் அடையாளம் காணப்பட்டுள்ளன.
பணச்சலவை தடுப்புச் சட்டத்தின் கீழ் குற்றம் புரிந்ததாக சந்தேகிக்கப்படும் 47 வயதுடைய நபரும் அவரது 45 வயதுடைய மனைவியும் கைது செய்யப்பட்டுள்ளனர்.
2026 செப்டம்பர் 22ஆம் திகதி முதல் 14 நாட்களுக்கு குறித்த சொத்துக்கள் மற்றும் வாகனங்களை முடக்குவதற்கான உத்தரவு பிறப்பிக்கப்பட்டுள்ளதாக சட்டவிரோத சொத்துக்கள் விசாரணைப் பிரிவு தெரிவித்துள்ளது.
சம்பவம் தொடர்பான மேலதிக விசாரணைகள் தொடர்ந்து முன்னெடுக்கப்பட்டு வருகின்றன.
