மட்டக்களப்பு, காத்தான்குடி பகுதியில் நீண்டகாலமாக போதைப்பொருள் விற்பனையில் ஈடுபட்டு வந்ததாகக் கூறப்படும் 44 வயதுடைய நபர் ஒருவர் 10 கிராம் 500 மில்லிகிராம் ஐஸ் போதைப்பொருளுடன் பொலிஸாரால் கைது செய்யப்பட்டுள்ளார்.
நேற்று வெள்ளிக்கிழமை (06) பகல் குறித்த சந்தேகநபரின் வீட்டை முற்றுகையிட்டு மேற்கொள்ளப்பட்ட சோதனையின்போதே அவர் கைது செய்யப்பட்டுள்ளார்.
மட்டக்களப்பு தலைமையக பொலிஸ் நிலையத்தின் பெரும் குற்றத்தடுப்புப் பிரிவு பொறுப்பதிகாரி பொலிஸ் பரிசோதகர் வை. விஜையராஜாவுக்குக் கிடைத்த இரகசியத் தகவலின் அடிப்படையில், மாவட்ட சிரேஷ்ட பொலிஸ் அத்தியட்சகரின் நேரடி வழிகாட்டலில் இந்த நடவடிக்கை முன்னெடுக்கப்பட்டுள்ளது.
பெரும் குற்றத்தடுப்புப் பிரிவு பொறுப்பதிகாரியின் தலைமையில் பொலிஸ் சார்ஜன்கள் இஹலகம, ஜயசிங்க, கொடிகார, டிகாசன் மற்றும் ராஜபக்ஷ உள்ளிட்ட பொலிஸ் குழுவினர் இந்தச் சுற்றிவளைப்பில் ஈடுபட்டுள்ளனர்.
இதன்போது போதைப்பொருள் விற்பனையில் ஈடுபட்டிருந்ததாகக் கூறப்படும் சந்தேகநபரைக் கைது செய்த பொலிஸார், அவரிடமிருந்து 10 கிராம் 500 மில்லிகிராம் ஐஸ் போதைப்பொருளையும் கைப்பற்றியுள்ளனர்.
கைது செய்யப்பட்டவர் ஏற்கனவே பல தடவைகள் போதைப்பொருள் தொடர்பான குற்றச்சாட்டுகளில் கைது செய்யப்பட்டு நீதிமன்றத்தில் ஆஜர்படுத்தப்பட்டு பிணையில் விடுவிக்கப்பட்டவர் என ஆரம்பகட்ட விசாரணைகளில் தெரியவந்துள்ளது.
நீண்டகாலமாக போதைப்பொருள் வியாபாரத்தில் ஈடுபட்டு வந்ததாகக் கூறப்படும் குறித்த சந்தேகநபரிடம் மேலதிக விசாரணைகளை முன்னெடுத்த பின்னர் நீதிமன்றத்தில் ஆஜர்படுத்த நடவடிக்கை எடுக்கப்பட்டுள்ளதாக பொலிஸார் தெரிவித்துள்ளனர்.
