மட்டக்களப்பு மாவட்டத்தின் படுவான்கரை பிரதேச மக்களின் நீண்டகால குடிநீர் தேவையை நிவர்த்தி செய்யும் வகையில், கரடியனாறு பண்ணைத்திடல் கிராமத்தில் குடிநீர் விநியோகத் திட்டமொன்று ஆரம்பிக்கப்பட்டுள்ளது.
கிழக்கு மாகாண சபையின் PSDG இணைந்த நிதி ஒதுக்கீட்டின் கீழ், ஏறாவூர்பற்று பிரதேச சபை மற்றும் மட்டக்களப்பு பிராந்திய தேசிய நீர்வழங்கல் மற்றும் வடிகாலமைப்பு சபை ஆகியவற்றின் இணைப்பில் இத்திட்டம் முன்னெடுக்கப்பட்டுள்ளது.
கரடியனாறு பண்ணைத்திடல் கிராமத்தில் 35க்கும் மேற்பட்ட குடும்பங்கள் முதற்கட்டமாக பயன்பெறும் வகையில் அமைக்கப்பட்டுள்ள குடிநீர் விநியோகத் திட்டத்தின் ஆரம்ப நிகழ்வு செப்டம்பர் 21ஆம் திகதி நடைபெற்றது.
இந்நிகழ்வில் மட்டக்களப்பு மாவட்ட நாடாளுமன்ற உறுப்பினர் வைத்தியர் இ.சிறிநாத் பிரதம அதிதியாகக் கலந்துகொண்டு திட்டத்தை ஆரம்பித்து வைத்தார்.
படுவான்கரை பிரதேசத்தின் குடிநீர் பிரச்சினை தொடர்பில் நாடாளுமன்ற விவாதங்கள், அமைச்சு மட்டக் கூட்டங்கள் மற்றும் மாவட்ட, பிரதேச ஒருங்கிணைப்புக் குழுக் கூட்டங்களில் தொடர்ச்சியாக கவனம் செலுத்தப்பட்டதாகவும், சம்பந்தப்பட்ட அமைச்சு மற்றும் தேசிய நீர்வழங்கல் அதிகாரிகளுடன் இடம்பெற்ற கலந்துரையாடல்களின் ஊடாக இத்திட்டத்திற்கான நடவடிக்கைகள் முன்னெடுக்கப்பட்டதாகவும் தெரிவிக்கப்பட்டுள்ளது.
நிகழ்வில் ஏறாவூர்பற்று பிரதேச சபைத் தவிசாளர் மு.முரளிதரன், பிரதேச சபை உறுப்பினர்களான நா.கஜேந்திரன், த.பிரபாகரன், கா.நாகேந்திரன் உள்ளிட்டோர், தேசிய நீர்வழங்கல் மற்றும் வடிகாலமைப்பு சபை அதிகாரிகள், பிரதேச சபை உத்தியோகத்தர்கள், ஊழியர்கள் மற்றும் கிராம மக்கள் கலந்துகொண்டனர்.
