உலகம் நெருக்கடியில் உள்ளது; மாற்றம் அனைவரையும் உள்ளடக்கியதாக இருக்க வேண்டும்; ஐ.நா.வில் விஜித ஹேரத்

உலகளாவிய மோதல்கள், காலநிலை பேரிடர்கள், பொருளாதார நெருக்கடிகள் மற்றும் அதிகரித்து வரும் சமத்துவமின்மைக்கு மத்தியில், சர்வதேச சமூகத்தில் நம்பிக்கையை மீட்டெடுக்கவும், அனைவரையும் உள்ளடக்கிய மாற்றத்தை ஏற்படுத்தவும் நடவடிக்கை எடுக்க வேண்டும் என வெளிவிவகார அமைச்சர் விஜித ஹேரத் வலியுறுத்தியுள்ளார்.

தீர்க்கப்படாத மோதல்கள், மனிதாபிமான நெருக்கடிகள், அடிக்கடி ஏற்படும் காலநிலை பேரிடர்கள், அதிகரித்து வரும் சமத்துவமின்மை மற்றும் தொழில்நுட்ப வளர்ச்சியின் வேகம் ஆகியவை உலகில் நம்பிக்கைச் சிதைவுக்கு முக்கிய காரணிகளாக இருப்பதாக அமைச்சர் சுட்டிக்காட்டினார்.

இந்த சவால்களுக்கு மத்தியில் சர்வதேச சட்டம், மனிதாபிமானம், தேசிய நல்லிணக்கம், நிலைபேறான அபிவிருத்தி மற்றும் பலதரப்பு ஒத்துழைப்பை வலுப்படுத்துவது அவசியம் எனவும் அவர் குறிப்பிட்டார்.

இலங்கையின் பொருளாதார நிலை

2022ஆம் ஆண்டின் பொருளாதார நெருக்கடிக்குப் பின்னர் இலங்கை பேரியல் பொருளாதார ஸ்திரத்தன்மையை மீட்டெடுத்துள்ளதாகவும், உலக வங்கியால் இலங்கை உயர்-நடுத்தர வருமானப் பொருளாதாரமாக மீள்வகைப்படுத்தப்பட்டுள்ளதாகவும் விஜித ஹேரத் தெரிவித்தார்.

காலநிலை மாற்றம் குறித்து எச்சரிக்கை

காலநிலை பேரிடர்களின் தாக்கம் குறித்து கவலை வெளியிட்ட அமைச்சர், உலகளாவிய உமிழ்வுகளுக்கு குறைந்த பங்களிப்பை வழங்கும் நாடுகளே காலநிலை மாற்றத்தின் கடுமையான விளைவுகளை எதிர்கொள்வதாகக் குறிப்பிட்டார்.

காலநிலை நீதி அவசரமான யதார்த்தமாக மாற வேண்டும் என வலியுறுத்திய அவர், 2030ஆம் ஆண்டுக்குள் 70 சதவீத புதுப்பிக்கத்தக்க எரிசக்தியைப் பயன்படுத்தவும், 2050ஆம் ஆண்டுக்குள் கார்பன் சமநிலையை அடையவும் இலங்கை இலக்கு நிர்ணயித்துள்ளதாக

தேசிய நல்லிணக்கத்திற்கு முக்கியத்துவம்

இலங்கை மூன்று தசாப்தங்களாக நீடித்த மோதலின் பாதிப்புகளை இன்னும் எதிர்கொண்டு வருவதாகவும், தேசிய ஒற்றுமை மற்றும் நல்லிணக்கத்தை வலுப்படுத்த அரசாங்கம் நடவடிக்கை எடுத்து வருவதாகவும் அமைச்சர் கூறினார்.Foreign Affairs

மேற்கு ஆசிய மோதல்கள் குறித்த கவலை

மேற்கு ஆசியா உள்ளிட்ட பல பகுதிகளில் நிலவும் மோதல்கள் இலங்கைக்கும் நேரடியான பாதுகாப்பு, பொருளாதார மற்றும் சமூக தாக்கங்களை ஏற்படுத்துவதாக விஜித ஹேரத் தெரிவித்தார்.

அனைத்து தரப்பினரும் சர்வதேச மனிதாபிமானச் சட்டம் உள்ளிட்ட சர்வதேச சட்டங்களை மதிக்க வேண்டும் எனவும், மோதல்களுக்கு பேச்சுவார்த்தை மூலமான தீர்வே முன்னேற்றத்திற்கான சாத்தியமான வழி எனவும் அவர் வலியுறுத்தினார்.

ஐ.நா. சீர்திருத்தம் அவசியம்

ஐக்கிய நாடுகள் சபை உலகளாவிய சவால்களை எதிர்கொள்வதில் முக்கிய பங்காளியாக இருப்பதாகக் குறிப்பிட்ட அமைச்சர், அமைப்பை மேலும் திறம்படவும், பிரதிநிதித்துவத்துடனும், பொறுப்புடனும் மாற்றுவதற்கான சீர்திருத்தங்கள் அவசியம் என தெரிவித்தார்.

மேலும், உலகில் இடம்பெறும் மாற்றங்கள் சில நாடுகள் அல்லது சமூகங்களுக்கு மட்டும் பயனளிப்பதாக இல்லாமல், அனைவரையும் உள்ளடக்கியதாக இருக்க வேண்டும் என அவர் வலியுறுத்தினார்.

இலங்கையின் நிலைப்பாட்டின்படி, உலகளாவிய அமைதி, மனித உரிமைகள், நிலைபேறான அபிவிருத்தி மற்றும் சர்வதேச ஒத்துழைப்பை வலுப்படுத்துவதன் மூலமே தற்போதைய பல்வேறு நெருக்கடிகளுக்கு நீண்டகால தீர்வுகளை உருவாக்க முடியும் என அமைச்சர் வலியுறுத்தினார்.