ஜனதா விமுக்தி பெரமுன (JVP) கட்சி, பலாங்கொட கஸ்ஸப தேரர் கூறிய கருத்தொன்று தொடர்பாக விசாரணை நடத்துமாறு கோரி, அக்டோபர் 23 அன்று குருந்துவத்த பொலிஸ் நிலையத்தில் முறைப்பாடு அளித்துள்ளது.
விகாரமாதேவி பூங்காவிற்கு அருகில் போராட்டத்தில் ஈடுபட்டிருந்த பௌத்த துறவிகளால், இரண்டு கத்திகளுடன் பிடிக்கப்பட்டதாகக் கூறப்படும் நபர் ஒருவர், பெலவத்தையிலுள்ள ஜேவிபி தலைமையகத்துடன் தொடர்புடையவர் என அந்தத் துறவி குற்றம் சாட்டியிருந்தார்.
இந்த குற்றச்சாட்டைத் தொடர்ந்தே இம்முறைப்பாடு செய்துள்ள ஜேவிபி, சந்தேகநபருக்கும் தமது பெலவத்தை அலுவலகத்திற்கும் இடையே எந்தவித தொடர்பும் இல்லை என மறுத்துள்ளது.
CIB II 289/237 எனும் பதிவு இலக்கத்தின் கீழ் பதிவு செய்யப்பட்டுள்ள இந்த முறைப்பாட்டில்,
”குறிப்பிடப்பட்ட கூற்று முற்றிலும் பொய்யானது என்றும், இது பொதுமக்களிடையே அமைதியின்மையை ஏற்படுத்தக்கூடும் என்றும் கட்சி சுட்டிக்காட்டியுள்ளது.
மேலும், ஜனாதிபதி அனுர குமார திசாநாயக்க அடிக்கடி தமது கட்சித் தலைமையகத்திற்கு வருகை தருவதால், வளாகத்தின் பாதுகாப்பு குறித்தும் ஜேவிபி கவலை வெளியிட்டுள்ளது.
இந்தக் குற்றச்சாட்டு குறித்து நியாயமான விசாரணை நடத்தப்பட வேண்டும் எனக் கோரியுள்ள கட்சி, இது தொடர்பான வீடியோ ஆதாரங்களையும் சமூக ஊடகப் பதிவுகளையும் பொலிஸாரிடம் ஒப்படைத்துள்ளது.
