நாட்டில் தற்போது நிலவும் மழையுடனான சீரற்ற வானிலை காரணமாக, பாடசாலைகளைத் தொடர்ந்து நடத்துவதா அல்லது மூடுவதா என்பது தொடர்பான தீர்மானங்களை மேற்கொள்ளும் அதிகாரம் மாகாணக் கல்விப் பணிப்பாளர்கள் மற்றும் செயலாளர்களுக்கு வழங்கப்பட்டுள்ளதாகக் கல்வி அமைச்சு தெரிவித்துள்ளது.
இது தொடர்பான வழிகாட்டுதல்கள் மற்றும் தேவையான அறிவுறுத்தல்கள் மாகாண அதிகாரிகளுக்கு வழங்கப்பட்டுள்ளதாகவும் அமைச்சு குறிப்பிட்டுள்ளது.
இந்நிலையில், மத்திய மாகாணத்தின் கண்டி மற்றும் நுவரெலியா மாவட்டங்களில் உள்ள சில கல்வி வலயங்களைச் சேர்ந்த 26 பாடசாலைகளின் கற்றல் நடவடிக்கைகள் இடைநிறுத்தப்பட்டுள்ளதாக மத்திய மாகாண ஆளுநர் ஹர்ஷ சுரங்க பெர்னாண்டோ தெரிவித்துள்ளார்.
நிலவும் சீரற்ற வானிலை மற்றும் அதனால் ஏற்படக்கூடிய பாதிப்புகளைக் கருத்திற்கொண்டு, மாணவர்கள் மற்றும் ஆசிரியர்களின் பாதுகாப்பை உறுதிப்படுத்தும் வகையில் பாடசாலைகளை நடத்துவது தொடர்பான தீர்மானங்கள் உரிய அதிகாரிகளால் மேற்கொள்ளப்படவுள்ளன.
எனவே, பாடசாலைகளின் செயற்பாடுகள் தொடர்பில் மாகாணக் கல்வி அதிகாரிகள் மற்றும் பாடசாலை நிர்வாகத்தினரால் வெளியிடப்படும் உத்தியோகபூர்வ அறிவிப்புகளைப் பின்பற்றுமாறு சம்பந்தப்பட்ட தரப்பினரிடம் கேட்டுக்கொள்ளப்பட்டுள்ளது.
